Yuvraj Singh: ఈ పిల్లాడిని విడిచి పెట్టొద్దు.. వైభవ్పై యువరాజ్ సింగ్ ప్రశంసలు..

Yuvraj Singh: ఇండియన్ ప్రీమియర్ లీగ్ (IPL2026 ) సీజన్‌లో రాజస్థాన్ రాయల్స్ (RR) వండర్‌కిడ్ వైభవ్ సూర్యవంశీ విధ్వంసకర బ్యాటింగ్‌పై టీమిండియా మాజీ దిగ్గజం, సిక్సర్ల కింగ్ యువరాజ్ సింగ్ ఆసక్తికర ట్వీట్ చేశారు. 15 ఏళ్ల ఈ యువ బ్యాటర్ ఆడిన ఇన్నింగ్స్‌కు యువీ ఫిదా అయిపోయారు. లక్నో సూపర్ జాయింట్స్ (LSG)తో జరిగిన హై-వోల్టేజ్ మ్యాచ్‌లో వైభవ్ చేసిన పరుగుల సునామీపై సోషల్ మీడియా వేదికగా యువరాజ్ సింగ్ ప్రశంసల జల్లు కురిపించారు.

ఆ పిల్లాడిని వదులుకోవద్దు: 
లక్నో నిర్దేశించిన 221 పరుగుల భారీ లక్ష్యాన్ని రాజస్థాన్ రాయల్స్ ఛేదించిన తీరుకు యువరాజ్ ఆశ్చర్యం వ్యక్తం చేశారు. వైభవ్ సూర్యవంశీని ట్యాగ్ చేస్తూ రాజస్థాన్ రాయల్స్ మేనేజ్‌మెంట్‌కు యువీ ఒక కీలక సూచన చేశారు. LSGతో జరిగిన మ్యాచ్‌లో 220 పరుగుల భారీ లక్ష్యం కూడా రాజస్థాన్ కేవలం 12 ఓవర్లలోనే ఛేదించేలా కనిపించింది. ఆ పిల్లాడిని (వైభవ్ సూర్యవంశీ) అస్సలు వదులుకోవద్దు అని సిక్సర్ల కింగ్ తన ట్వీట్‌లో పేర్కొన్నారు.

క్రికెట్ వర్గాల్లో యువీ ట్వీట్ ట్రెండ్: 
మంగళవారం రాత్రి జైపూర్‌ వేదికగా జరిగిన ఈ మ్యాచ్‌లో ఇంపాక్ట్ ప్లేయర్‌గా వచ్చిన వైభవ్ సూర్యవంశీ లక్నో బౌలర్లను ఊచకోత కోశారు. కేవలం 38 బంతుల్లోనే 7 ఫోర్లు, 10 సిక్సర్లతో 93 పరుగులు చేసి తృటిలో సెంచరీ చేజార్చుకున్నారు. 244.73 స్ట్రైక్ రేట్‌తో అతడు ఆడిన ఈ ఇన్నింగ్స్ కారణంగానే అంతటి భారీ లక్ష్యం కూడా రాజస్థాన్‌కు చాలా సులువుగా మారిపోయింది.

►ALSO READ | ముంబైతో కేకేఆర్ చావో రేవో పోరు.. రహానే సేన ప్లేఆఫ్స్ గండం గట్టెక్కేనా?

వైభవ్ రికార్డుల వేట: 
ఈ అద్భుత ఇన్నింగ్స్‌తో వైభవ్ సూర్యవంశీ ఐపీఎల్ 2026 ఆరెంజ్ క్యాప్ (579 పరుగులు) రేసులో అగ్రస్థానానికి చేరుకోవడమే కాకుండా పలు రికార్డులను కూడా బద్దలు కొట్టారు. అతి చిన్న వయసులోనే (15 ఏళ్లు) ఒక ఐపీఎల్ సీజన్‌లో 500 పరుగుల మార్కును దాటిన తొలి ప్లేయర్‌గా రిషభ్ పంత్ రికార్డును బ్రేక్ చేశారు. ఒకే ఐపీఎల్ సీజన్‌లో 50+ కంటే ఎక్కువ సిక్సర్లు (ప్రస్తుతం 53 సిక్సర్లు) కొట్టిన తొలి భారతీయ బ్యాటర్‌గా రికార్డు సృష్టించారు. యువరాజ్ సింగ్ లాంటి లెజెండ్ నుంచి ఇలాంటి ప్రశంస దక్కడం వైభవ్ భవిష్యత్తుకు కొండంత బూస్టింగ్ అని చెప్పవచ్చు. ఈ విజయంతో రాజస్థాన్ రాయల్స్ ప్లేఆఫ్స్ రేసులో మరింత ముందుకు వెళ్లింది. 

Looks like 220 chase is already achieved in the 12th over by @rajasthanroyals

p.s. do not drop this kid #VaibhavSooryavanshi #ipl #LSGvsRR

— Yuvraj Singh (@YUVSTRONG12) May 20, 2026