రాను రాను ఇళ్ల సైజు తగ్గిపోతోంది. అపార్ట్మెంట్లలో అయితే మరీ ఎక్కువగా ఉంది. గత ఐదేళ్లలో ఫ్లాట్ల సైజు 27 శాతం తగ్గిపోయింది. హైదరాబాద్, ముంబై, ఢిల్లీ, బెంగళూరు, చెన్నై, కోల్కతా వంటి నగరాల్లో ఇంటి సైజులు బాగా తగ్గిపోయాయి. అనరాక్ అనే రియల్ ఎస్టేట్ కన్సల్టెన్సీ ఈ విషయాలు వెల్లడించింది. 2014లో ఆ సిటీల్లో ఫ్లాట్ సగటు విస్తీర్ణం 1400 చదరపుటడుగులు కాగా, 2019కి అది 1,020కి తగ్గిపోయింది. ఒక్కొక్క సిటీలో ఒక్కోలా ఫ్లాట్ల సైజులు తగ్గిపోతున్నాయి. దాని ఎఫెక్ట్ ఎక్కువగా ముంబైలోనే ఉంది. 2014లో 960 చదరపుటడుగులుగా ఉన్న ఫ్లాట్ల సైజులు, ఈ ఏడాది 530 చదరపుటడుగులకు తగ్గింది. పుణెలో 38 శాతం తగ్గిపోయింది. ప్రస్తుతం సగటున 600 చదరపుటడుగుల ఫ్లాట్లను ఎక్కువగా అమ్ముతున్నారు.
హైదరాబాద్లో ఒకప్పుడు సగటు ఫ్లాట్ విస్తీర్ణం 1,570 చదరపుటడుగులు ఉండగా ఇప్పుడు 12 శాతం కోత పడింది. చెన్నై (1,190) 8 శాతం, బెంగళూరు (1,300) 9 శాతం మేర ఫ్లాట్ల సైజులు తగ్గాయి. కోల్కతాలో 2014లో 1,230 చదరపుటడుగులుగా ఉన్న అపార్ట్మెంట్లు ఇప్పుడు 9 శాతం తగ్గి 1,120 చదరపుటడుగుల్లోనే ఉంటున్నాయి. ప్రస్తుతం దేశంలో ఆర్థిక మాంద్యం పరిస్థితులు కనిపిస్తున్నాయి. ఈ ఏడాదే ఆ పరిస్థితులున్నా రెండేళ్లుగా రియల్ఎస్టేట్కు డిమాండ్ లేకపోవడంతో ధరల్లో ఎలాంటి మార్పులు ఉండట్లేదు. దీంతో ధరలు తగ్గించలేక రియల్ వ్యాపారులు, డెవలపర్లు ఫ్లాట్ల సైజులు తగ్గిస్తున్నారని నిపుణులు చెబుతున్నారు. ప్రభుత్వం 45 లక్షల లోపు ఇళ్లకు జీఎస్టీ, సబ్సిడీలు ఇస్తుండడమూ ఫ్లాట్ల సైజులు తగ్గించడానికి కారణమవుతోందంటున్నారు. ఫ్లాట్ల సైజు 28 శాతం తగ్గడం వల్ల అపార్ట్మెంట్ల ధరలు 40 లక్షల లోపు ఉంటున్నాయన్నారు. 17 శాతం తగ్గించిన ఫ్లాట్ల ధరలు ₹40 లక్షల నుంచి ₹80 లక్షల దాకా ఉంటున్నాయని చెబుతున్నారు.
…………………….
