నేరడిగొండ , వెలుగు : హలో నీకు ఇన్కం, క్యాస్ట్ సర్టిఫికెట్లు కావాలా అయితే నాతో మాట్లాడు.. లేకపోతే నీ అప్లికేషన్లను రిజెక్ట్ చేస్తా’ అంటూ తహసీల్దార్ఆఫీసులో అటెండర్ ఓ మహిళతో అసభ్యంగా మాట్లాడాడు. దీంతో ఆమె కుటుంబసభ్యులు అతడిని పట్టుకుని చితకబాదారు. ఆదిలాబాద్ జిల్లా నేరడిగొండకు చెందిన ఓ వివాహిత కుల, ఆదాయ ధ్రువీకరణ పత్రాల కోసం తహసీల్దార్ ఆఫీసులో దరఖాస్తు చేసుకుంది. అందులో ఆమె ఫోన్ నంబర్ ఉండగా ఆఫీసులో అటెండర్ గా పని చేసే అశోక్ ఫోన్లో ఫీడ్ చేసుకున్నాడు. బుధవారం రాత్రి ఆమెకు అసభ్యకర మెసేజ్లు పంపడంతో పాటు వాట్సాప్లో వాయిస్ మెసేజ్లు పంపించాడు.
తన పేరు రవి అని, తహసీల్దార్ఆఫీసులో పని చేస్తానని సర్టిఫికెట్స్ కావాలంటే తనతో మాట్లాడాలని కోరాడు. లేకపోతే సర్టిఫికెట్స్, రేషన్ కార్డు అన్నీ రిజెక్ట్ చేస్తానని బెదిరించాడు. దీంతో ఆమె తన కుటుంబసభ్యులకు విషయం చెప్పింది. వారు గురువారం తహసీల్దార్ ఆఫీసుకు వచ్చి జూనియర్ అసిస్టెంట్ రవిని నిలదీశారు. ఆ వాయిస్ తనది కాదని చెప్పడంతో ఎవరై ఉంటారా అని ఆరా తీశారు. వాట్సాప్లో పంపించిన వాయిస్ రికార్డు ఆధారంగా అది అశోక్ వాయిస్ అని గుర్తించారు. తర్వాత అతడిది మండలంలోని వడూర్ అని తెలుసుకుని అక్కడికి వెళ్లారు. అశోక్ను పట్టుకొని చెప్పులతో కొట్టి పోలీసులకు అప్పగించారు.