బషీర్బాగ్, వెలుగు: గోషామహల్ సెగ్మెంట్ పరిధి అంగన్ వాడీ సెంటర్లలోని పిల్లలకు శ్రేష్ఠ్ ఫౌండేషన్ ఆధ్వర్యంలో ఉచితంగా ప్రీ స్కూల్ మెటీరియల్ పంపిణీ కార్యక్రమం మంగళవారం జరిగింది. సంజయ్ నగర్, ఓల్డ్ ఫీల్ ఖానా, ఓంనగర్, ఎస్ డీనగర్, మచిలీపురా, మేవాటిపురా ప్రాంతాల్లోని అంగన్ వాడీ కేంద్రాల్లో స్కూల్ మెటీరియల్ను శ్రేష్ఠ్ ఫౌండేషన్ వ్యవస్థాపకుడు, బీజేపీ నేత విక్రమ్ గౌడ్ పంపిణీ చేశారు. ఈ సందర్భంగా విక్రమ్ గౌడ్ మాట్లాడుతూ..
అంగన్ వాడీ కేంద్రాల్లో అన్ని వసతులతో మంచి విద్య అందిస్తే పిల్లల చదువుకు బలమైన పునాది ఏర్పడుతుందన్నారు. తన తండ్రి, దివంగత నేత ముఖేశ్గౌడ్ స్ఫూర్తితోనే శ్రేష్ఠ్ఫౌండేషన్ ఆధ్వర్యంలో ఇలాంటి కార్యక్రమాలు నిర్వహిస్తున్నట్లు ఆయన చెప్పారు. ఆర్థిక కారణాలతో చదువుకు దూరమయ్యే పరిస్థితి ఉన్న పిల్లలను 10వ తరగతి వరకు వారు కోరుకున్న విధంగా చదివించే బాధ్యతను తాను తీసుకుంటానని ప్రకటించారు. గోషామహల్సెగ్మెంట్లోని అన్ని అంగన్వాడీ సెంటర్లను రాష్ట్రంలోనే ఆదర్శంగా తీర్చిదిద్దాలన్నారు. శ్రేష్ఠ్ ఫౌండేషన్ ఆధ్వర్యంలో విద్య, క్రీడలు, ఉపాధి నైపుణ్య శిక్షణ.. ఇలా ప్రతిరంగంలో సేవా కార్యక్రమాలు నిర్వహించేందుకు ప్లాన్ రూపొందిస్తున్నట్లు ఆయన వివరించారు.
