ఓ చిన్న అవకాడో.. మహా అయితే 170 గ్రాములుంటుంది. అదే పెద్దదైతే ఓ కిలో వరకు తూగుతుంది. కానీ, హవాయిలోని ఓ ఫ్యామిలీ పండించిన అవకాడో దానికి డబుల్ ఉంది. 2.55 కిలోల బరువుతో గిన్నిస్ రికార్డుల్లోకెక్కింది. హవాయికి చెందిన జూలియన్ పోకిని అనే ఆమె తన బావ ఇచ్చిన విత్తనంతో ఈ అవకాడో చెట్టును పెంచింది. అయితే, ఆ చెట్టుకు పండిన అవకాడో ఇంత పెద్దగా వస్తుందని ఎప్పుడూ అనుకోలేదని చెప్పింది. పండు పెరుగుతున్న కొద్దీ చెట్టుకే ఉంచామని, పది నెలల పాటు దానిని కొయ్యకుండా ఉన్నామని వివరించింది. ఆ పండుకు గిన్నిస్ రికార్డు కూడా ఊరికే ఏం రాలేదు. ఎంతో ఓపికగా ఎదురుచూసింది ఆ కుటుంబం.
దాదాపు మూడు నెలలు వేచి చూసింది. తమ అవకాడోకు ఎందుకు రికార్డు ఇవ్వాలో వివరిస్తూ సరైన ఆధారాలు పంపించింది. అన్నింటినీ జాగ్రత్తగా పరిశీలించాకే గిన్నిస్ బుక్కోళ్లు దానికి ప్రపంచంలోనే అతిపెద్ద అవకాడోగా రికార్డు ఇచ్చారు. జూలియన్ కొడుకు తల సైజంత ఉందీ అవకాడో. కాగా, అంతకుముందు ప్రపంచంలోనే అతిపెద్ద అవకాడోగా హవాయికే చెందిన ఫెలిసిడాడ్ పసాలో అనే మహిళ పండించిన అవకాడోకు ఉండేది. 2018 జనవరిలో గిన్నిస్ రికార్డు పొందిన ఆ అవకాడో బరువు 2.50 కిలోలు. ఇప్పుడు జస్ట్ 50 గ్రాముల తేడాతో పాత రికార్డును పోకినీ అవకాడో బీట్ చేసింది.