శ్రీనగర్ : జమ్మూకాశ్మీర్ కు చెందిన ప్రముఖ రాజకీయ నాయకుడు, మాజీ సీఎం ఫరూక్ అబ్దుల్లా నేషనల్ కాన్ఫరెన్స్(ఎన్సీ) పార్టీ ప్రెసిడెంట్ పదవి నుంచి తప్పుకుంటున్నట్లు శుక్రవారం ప్రకటించారు. ఆ పదవిలో కొత్త వారికి అవకాశం ఇవ్వాల్సిన టైమ్ వచ్చిందని వెల్లడించారు. "ఇకపై నేను పార్టీ ప్రెసిడెంట్ పదవికి పోటీ చేయను. డిసెంబర్ 5న ఆ పదవికి ఎన్నికలు జరుగుతాయి. కొత్త వ్యక్తి బాధ్యతలు స్వీకరించాల్సిన టైమొచ్చింది. ప్రజాస్వామ్య విధానంలో ఎన్నిక జరుగుతుంది.
పార్టీ నుంచి ఎవరైనా పోటీ చేయవచ్చు." అని ఫరూక్ అబ్దుల్లా చెప్పారు. అబ్దుల్లా 1983లో తొలిసారి నేషనల్ కాన్ఫరెన్స్ ప్రెసిడెంట్ అయ్యారు. ప్రస్తుతం ఆయన పార్టీ ప్రెసిడెంట్ బాధ్యతల నుంచి వైదొలుగుతుండటంతో.. పార్టీ వైస్ ప్రెసిడెంట్ గా ఉన్న ఒమర్ అబ్దుల్లానే కొత్త చీఫ్‌‌‌‌గా బాధ్యతలు చేపట్టే అవకాశం ఉందని ప్రచారం జరుగుతోంది.
