హైదరాబాద్, వెలుగు: సికింద్రాబాద్ ఘటనలో నిరుద్యోగులపై పెట్టిన కేసులు ఎత్తేయాలని టీజేఎస్ అధ్యక్షుడు కోదండరాం డిమాండ్ చేశారు. నిరసన లో జరిగిన ఆస్తి నష్టాన్ని చూస్తున్నారే తప్ప, దేశంలో పెరిగిన నిరుద్యోగ తీవ్రత ను అర్థం చేసుకోవడం లేదని అన్నారు. హైదరాబాద్ నాంపల్లిలోని టీజేఎస్ స్టేట్ ఆఫీసులో శనివారం కోదండరాం మీడియాతో మాట్లాడారు. ఫిజికల్ టెస్ట్ లు పూర్తి చేసుకుని రిక్రూట్మెంట్ కు రెడీ గా ఉన్న టైంలో నోటిఫికేషన్ రద్దు చేస్తే ఎట్లా అని ప్రశ్నించారు. కాంట్రాక్టు పద్ధతి లో రిక్రూట్మెంట్ చేపట్టడం సిగ్గుచేటన్నా రు. ఆందోళనకారులపై కాల్పులు జరపడం పద్ధతికాదని మండిపడ్డారు. అగ్నిపథ్ను వెనక్కి తీసుకోవాలని, ఫైరింగ్కు కారకులను గుర్తించి చర్యలు తీసుకోవాలన్నారు. అల్లర్లపై సిట్టింగ్ జడ్జితో న్యాయవిచారణ జరిపించాలని, గాయపడిన వారికి మెరుగైన వైద్యం అందించాలని డిమాండ్ చేశారు.
