‘వీలైతే ప్రేమిద్దాం డూడ్. పోయేదేముంది? మహా అయితే తిరిగి ప్రేమిస్తారు’ అంటాడు ఒక తెలుగు సినిమాలో హీరో. ఈ ఫొటోలో కనిపిస్తున్న పెద్దాయనది కూడా సేమ్ డైలాగ్. కాకపోతే కొంచెం మార్చి సింపుల్గా ‘లవ్ ఎవ్రీబడీ’ అంటున్నాడు. అంతేకాదు, అదే మాటను ఒక కాగితంపై రాసి, తనను కలిసిన వాళ్ళకు ఇస్తుంటాడు. దాంతోపాటు ఒకటి లేదా రెండు డాలర్లు డబ్బు కూడా ఇస్తాడు. కొంతమందికి ఐదు డాలర్లు కూడా ఇచ్చాడు. దానికి బదులుగా వాళ్లను ‘లవ్ ఎవ్రీబడీని ప్రచారం చేయండి’ అని అడుగుతున్నాడు. ఇలా ఆయన ఎనిమిదేండ్లుగా చేస్తున్నాడు.
దాని కోసం ఇప్పటివరకు 13వేల డాలర్ల (సుమారు 10 లక్షలు) పైనే ఖర్చు పెట్టాడు. ఆయన ఇలా చేయడం వెనక ఒక అమ్మ ప్రేమ ఉంది. ఈ పెద్దాయనకు వాళ్ల అమ్మ చనిపోతూ చెప్పిన మాట ‘లవ్ ఎవ్రీబడీ’. ఈ మాటను ఆయన పాటించడమే కాదు, అందరికీ చెప్తున్నాడు కూడా. ఈయన కథను కెవిన్ కేట్ అనే వ్యక్తి ట్వీట్ చేయడంతో అది వైరల్గా మారింది. ఆ పెద్దాయనను, ఆయన పంచుతున్న ప్రేమ స్ఫూర్తిని అందరూ మెచ్చుకుంటూ కామెంట్లు, రీట్వీట్లు చేస్తున్నారు. ఇంతకీ ఈయన ఎక్కడుంటాడో చెప్పలేదు కదూ? అమెరికాలోని టల్హాసీ టౌను దగ్గరలోని ఒక హైవేకి ఆనుకొని ‘వఫల్ హౌస్’ అనే రెస్టారెంట్ ఉంది. అందులో కనిపిస్తాడు.
