ఒక కథని బొమ్మల రూపంలో చెప్పడం కామిక్స్ స్పెషాలిటీ. మన దేశంలో కూడా కొన్ని కామిక్స్ బుక్స్ వచ్చాయి. ఇప్పుడు జనరేషన్ మారింది కనుక ఈ కామిక్స్ బుక్స్ కూడా డిజిటల్ అయిపోయాయి. ఇలాంటివే యూట్యూబ్లో కనిపిస్తున్న ‘అమ్మాచిస్ అమేజింగ్ మెషిన్స్’ . ఇందులో కథలోని ప్రతి లైన్కు ఒక బొమ్మ, డైలాగ్ ఉంటాయి. అంతేకాదు, బ్యాక్గ్రౌండ్లో ఆ డైలాగ్ వినిపిస్తుంది కూడా. ఈ వాయిస్ ఓవర్ వస్తున్నప్పుడు ఏ మాట పలుకుతారో.. అవి కలర్లో హైలైట్ అవుతాయి. ఈ కొత్త తరహా కామిక్స్ తెచ్చిన వాళ్లే ప్రియ కురియన్, రాజీవ్ . పుట్టి పెరిగిన ఊరు, చుట్టుపక్కల మనుషులు, వాతావరణమే ప్రియ, రాజీవ్ ఆర్ట్ వర్క్కి ఇన్స్పిరేషన్. చిన్నప్పటి నుంచి ఇద్దరికీ బొమ్మల పుస్తకాలంటే మస్త్ ఇష్టం. దాంతో పెద్దయ్యాక యానిమేషన్ కోర్స్ చేసి, ఇలుస్ట్రేటర్స్గా మారారు. వీళ్లిద్దరూ కేరళకు చెందినవాళ్లు. కానీ ప్రస్తుతం బెంగళూరులో ఉంటున్నారు. ఈ మధ్యే ఇ–బుక్స్ కూడా తెచ్చారు.
ఫైనల్ ఇయర్లోనే మొదటి పుస్తకం
‘సాహిత్యంలో పిల్లల పుస్తకాలు కూడా ముఖ్యమైనవే’ అంటున్న ప్రియకు బొమ్మలు గీయడం అంటే ఇష్టం. ఆ ఇష్టంతోనే యానిమేషన్ కోర్స్లో ఇలుస్ట్రేషన్ ఆర్ట్ చదివింది. అప్పుడే తనకి పిల్లల కథల పుస్తకాలకి బొమ్మలు వేయాలనే ఆలోచన వచ్చింది. దాంతో తన యానిమేషన్ వర్క్ని చెన్నైలోని ‘తులిక బుక్స్’ కి పంపించింది. వాళ్లకు అవి బాగా నచ్చడంతోఒక పుస్తకానికి బొమ్మలు వేసే అవకాశం ఇచ్చారు. ఫైనల్ ఇయర్లో ఉండగానే పిల్లల కథల పుస్తకానికి ఇలుస్ట్రేటర్గా పనిచేసింది. ఆ బుక్ పాపులర్ కావడంతో మరిన్ని బుక్స్కి బొమ్మలేసే ఛాన్స్ వచ్చింది ప్రియాకు. కథలోని క్యారెక్టర్లు, వాటి రూపురేఖల్ని బట్టి ఇలుస్ట్రేషన్స్ వేస్తుంది. ఒక చిన్న ఏనుగు పిల్ల మీద వచ్చిన ‘ఐ యామ్ సో స్లీపీ’, బామ్మ క్యారెక్టర్తో వచ్చిన ‘అమ్మాచిస్ గ్లాసెస్’ పుస్తకాలు ప్రియని పాపులర్ చేశాయి. ఇప్పటివరకు 60 పుస్తకాలకి బొమ్మలేసింది ప్రియ.
