ఏ ఇంటి కిచెన్ షెల్ఫ్లో చూసినా అంతో ఇంతో ప్లాస్టిక్ కట్లెరీ, ప్యాకేజింగ్ బాక్స్లు కనిపిస్తాయి. అవి చూసినప్పుడల్లా ‘వీటిని ఎలాగైనా వదిలించుకోవాలి, ప్లాస్టిక్ వాడకాన్ని ఎలాగైనా తగ్గించాల’ని చాలా గట్టిగా అనుకుంటారు. కానీ ప్లాస్టిక్ వాడకంలో ఉన్న కన్వీనియెన్స్, తక్కువ రేటు, రెడీ టు యూజ్ అనేట్టు ఉండటంతో... ప్లాస్టిక్కి ప్రత్యామ్నాయంగా మరో ఆప్షన్ కనిపించదు. దాంతో ఒక పక్క వద్దనుకుంటూనే... మరో పక్క ప్లాస్టిక్ వాడాల్సిన పరిస్థితి. అలాంటి వాళ్లు కొన్ని టెక్నిక్స్ పాటిస్తే ఇంటి బూజు దులిపినట్టే.. ప్లాస్టిక్ను వంటింట్లోకి రాకుండా చేయొచ్చు.
- ప్లాస్టిక్ కట్లెరీ చూడగానే కంటికి ఇంపుగా కనిపిస్తుంది. కానీ ప్లాస్టిక్ భూమిలో కలిసిపోవడానికి కొన్నివేల ఏండ్లు పడుతుంది. ఈ విషయం ప్లాస్టిక్తో తయారుచేసిన వస్తువు వాడినప్పుడల్లా గుర్తుకొస్తే... ఆ తరువాత వాటివైపు చూపుపోదు. ఉదాహరణకు ఇంట్లో ప్లాస్టిక్ స్పూన్లు వాడుతుంటే వాటికి బదులు చెక్క, మెటల్తో చేసినవి వాడొచ్చు. అలాగే ఈ మధ్య ఎర్తీ ఫ్రెండ్లీగా తయారైన వస్తువులు మార్కెట్లోకి వస్తున్నాయి. వాటిని వాడితే ఆరోగ్యానికి, పర్యావరణానికి మేలు చేయడమే కాకుండా... ఇంటికి క్లాసీ లుక్ కూడా ఇచ్చినట్టు అవుతుంది.
- ప్లాస్టిక్ కట్లెరీ వాడొద్దన్నారు కదా అని ఇంట్లో ఉన్న వాటన్నింటినీ వెంటనే బయట పారేయాల్సిన అవసరం లేదు. కాస్త కళాత్మకంగా ఆలోచించి వాటితో అందమైన ఫ్రేమ్స్ లేదా పూలు చేయొచ్చు. జామ్, పచ్చళ్ల బాటిల్స్ను కట్లెరీ పెట్టుకోవడానికి వాడుకోవచ్చు. అలా వాడితే వాటిని పెట్టుకునేందుకు విడిగా ప్లాస్టిక్ హోల్డర్ కొనాల్సిన అవసరమే రాదు.
- డిస్పోజబుల్ కాఫీ మగ్స్, టీ కప్పుల బదులు మళ్లీ వాడేలా రీయూజబుల్ గ్లాస్ లేదా బాటిల్స్, మంచినీళ్లు వెంట తీసుకెళ్లేందుకు కాపర్ లేదా స్టీల్ బాటిల్స్ వాడొచ్చు. ఇంట్లో ఉన్న ప్లాస్టిక్ బాటిల్స్ను కిచెన్ గార్డెన్లో లేదా ఇంట్లో డెకరేట్ పీస్గా పెట్టి... వాటిలో మొక్కలు పెట్టుకోవచ్చు. ఒక ప్లాస్టిక్ స్ట్రా డీకంపోజ్ అయ్యేందుకు 300 నుంచి 500 ఏండ్లు పడుతుంది. అందుకని వాటికి బదులు మెటల్, పేపర్ లేదా వెదురు స్ట్రాలు వాడొచ్చు. ఇంటినుంచి బయటకెళ్లేటప్పుడు రీయూజబుల్ స్ట్రాలు పట్టుకెళ్లొచ్చు.
- ప్లాస్టిక్ గిన్నెలకు బదులు చెక్కవి వాడాలి. పాత ప్లాస్టిక్ గిన్నెలను మొక్కలకు సపోర్టుగా ఉండే ట్రేలా పెట్టుకోవచ్చు. లేదా పక్షులకు ఫుడ్ పెట్టేందుకు వాడొచ్చు.
- పాత కాలంలో వాడిన ఇనుప పెనం, స్టీల్ కత్తుల లాంటివి కాస్త బాగు చేసుకుంటే సూపర్గా ఉపయోగపడతాయి. ఒకవేళ మీకు అవి అవసరం లేకపోతే తోబుట్టువులకు లేదా మీ పిల్లలకు ఇవ్వొచ్చు. అవికూడా వారసత్వ ఆస్తులే! ఇలా చేయడం వల్ల వాటిని కొనాల్సిన ఖర్చు తగ్గి డబ్బు కూడా ఆదా అవుతుంది.
- పండ్లు, కాయగూరలను శుభ్రం చేసేందుకు రెగ్యులర్గా డిస్ఇన్ఫెక్టెంట్స్ను ఎక్కువ కాలం వాడటం వల్ల చర్మం దెబ్బతింటుంది. రోగాలు కూడా వస్తాయి. అంతేకాదు ఈ రసాయనాలు పర్యావరణానికి కూడా ప్రమాదమే. అందుకే పండ్లు, కాయగూరలు శుభ్రం చేసేందుకు వాడే ప్రొడక్ట్స్ తీసుకునేముందు రసాయనాలతో తయారైనవా? సహజ ఉత్పత్తులతో తయారుచేసినవా? అనేది గమనించాలి. సహజ పదార్థాలతో తయారు చేసిన డిస్ఇన్ఫెక్టెంట్స్నే వాడాలి. అలాంటివి అయితే పండ్లు, కాయగూరల క్వాలిటీ దెబ్బ తినదు. ఎక్కువ రోజులు తాజాగా ఉంటాయి.