స్వర్ణ దేవాలయం గురించి తెలుసుకదా! ఆ గుడిని మొత్తం బంగారంతో కట్టారు కాబట్టే దానికి ఆ పేరొచ్చింది. అంత ఫేమస్ అయింది! ఈ హోటల్ కూడా అంతే ఫేమస్ మరి. ఎందుకూ అంటారా! ఆ హోటల్ పేరుతో పాటు అందులోని ప్రతి వస్తువులోనూ బంగారం ఉంది మరి. సీలింగ్ దగ్గర్నుంచి స్విమ్మింగ్ పూల్ వరకూ, వడ్డించే స్పూన్లు, గంటెల నుంచి ప్లేట్ల వరకూ, టాయిలెట్ల నుంచి బాత్ టబ్బుల వరకూ అన్ని బంగారంతోనే చేయించారు. అదే గోల్డెన్ బే హోటల్. వియత్నాంలోని దనాంగ్లో ఉంది.
మూడేళ్ల క్రితం హొవా బిన్ గ్రీన్ కార్పొరేషన్ అనే కంపెనీ ఆ హోటల్ను కట్టించింది. 28 అంతస్తుల్లో కట్టిన ఈ హోటల్ ప్రతి అంతస్తులోనూ బంగారమే స్పెషల్. రిసెప్షన్ దగ్గర గోడలకూ, లాబీల్లోని సీలింగ్కూ బంగారం తాపడం వేయించింది కంపెనీ. కుర్చీలూ బంగారమే. అంతేకాదు, గోడలకు పెట్టే అలంకరణ సామగ్రినీ బంగారంతోనే చేయించింది. హోటల్ పై అంతస్తులో ఉన్న స్విమ్మింగ్పూల్ అడుగును బంగారంతో పూతపూయించింది.
ఈ ఇన్ఫినిటీ స్విమ్మింగ్ పూల్ గిన్నిస్ రికార్డుల్లోకీ ఎక్కింది. మరి, బాత్రూంలకు బంగారం ఎందుకంటే.. ఎంత ఒత్తిడి ఉన్నా స్నానం చేస్తే అదంతా పోయి హాయిగా ఉంటుందని, మంచి మంచి ఆలోచనలూ బాత్రూంలోనే వస్తుంటాయని, అందుకే బాత్రూంలోనూ బంగారం పెట్టించామని కంపెనీ చెబుతోంది. మరి, అంత బంగారంతో కట్టించిన హోటల్లో ఉండాలంటే అంతే డబ్బులు ఖర్చు పెట్టాలి. విలాసాల్లో మునిగి తేలాలంటే చేతి చమురు వదలాల్సిందే! బాగుంది కదా ఈ బంగారం హోటల్!
