- ప్లాస్టిక్ వాడకం తగ్గించే ఎనీ టైమ్ బ్యాగ్
- బాలానగర్ ఫ్రూట్ మార్కెట్లో ఏటీఎం లాంటి ఏటీబీ
- ప్రైవేట్ కంపెనీలతో కలిసి ఏర్పాటు చేసిన బల్దియా
- సిటీలోని మరిన్ని చోట్ల పెట్టాలని జనాల నుంచి రిక్వెస్టులు
కూకట్పల్లి, వెలుగు: ప్లాస్టిక్ క్యారీ బ్యాగ్ల వాడకం తగ్గించేందుకు బాలానగర్ ఫ్రూట్ మార్కెట్లో ప్రయోగాత్మకంగా ఏర్పాటు చేసిన ఏటీబీ(ఎనీ టైమ్ బ్యాగ్)కు జనం నుంచి మంచి రెస్పాన్స్ వస్తోంది. తక్కువ రేటుకే ప్లాస్టిక్ కంటే మంచి క్వాలిటీ కాటన్ బ్యాగ్ అందిస్తుండడంతో హ్యాపీగా తీసుకుంటున్నారు. కూకట్పల్లి సర్కిల్ పరిధిలోని బాలానగర్ ఫ్రూట్ మార్కెట్లో ‘మోవేట్, యునైటెడ్వే’ అనే సంస్థల సహకారంతో జీహెచ్ఎంసీ అధికారులు ఈ ఏటీబీ మెషీన్ను ఏర్పాటు చేశారు. రెండు వారాల క్రితం జోనల్ కమిషనర్ మమత ప్రారంభించారు. క్యారీ బ్యాగ్ఆకారంలో, చిన్నగా ఉండడంతో మార్కెట్కు వచ్చే కొనుగోలుదారులను విశేషంగా ఆకట్టుకుంటోంది. ఇది సేమ్ ఏటీఎం మాదిరిగానే పనిచేస్తుంది. అక్కడ స్వైపింగ్ కార్డు ద్వారా డబ్బు డ్రా చేసుకుంటే, ఇక్కడ 10 రూపాయల నోట్ పెడితే ఏటీబీ ఒక కాటన్ క్యారీ బ్యాగ్ ఇస్తుంది.
ఈ బ్యాగ్లో దాదాపు 5 కిలోల వరకు పండ్లు, కూరగాయలు తీసుకెళ్లొచ్చు. క్యారీ బ్యాగ్లు లేకుండా మార్కెట్కు వచ్చేవారు ఈ మెషీన్ను ఎక్కువగా వినియోగించుకుంటున్నారు. రూ.15 – 20 పెట్టి ప్లాస్టిక్ కవర్ కొనే కంటే రూ.10 పెట్టి కాటన్ బ్యాగ్తీసుకోవడం మేలని, రీయూజ్ చేసుకునేందుకు వీలుగా ఉంటుందని చెబుతున్నారు. సిటీలోని ఇతర మార్కెట్లు, రైతు బజార్ల వద్ద కూడా ఏర్పాటు చేయాలని కోరుతున్నారు. త్వరలో కేపీహెచ్బీ కాలనీ – జేఎన్టీయూ రోడ్డులోని రైతుబజార్లో ఏటీబీ పెట్టేందుకు ప్లాన్ చేస్తున్నట్లు అధికారులు తెలిపారు. తర్వాత సిటీలో అన్ని మార్కెట్లలో ఏర్పాటు చేస్తామంటున్నారు.
ఏటీబీ చాలా బాగుంది
ఏటీబీ మెషీన్ ఐడియా చాలా బాగుంది. పొద్దున్నే హడావుడిగా మార్కెట్కు వెళ్లినప్పుడు, ఆఫీసు నుంచి ఇంటికి వెళ్లే టైంలో పండ్లు, కూరగాయలు తీసుకోవాలన్నా తప్పక ప్లాస్టిక్ బ్యాగ్ కొనాల్సి వస్తోంది. అలాంటి టైంలో రూ.10లకే క్వాలిటీ కాటన్ బ్యాగ్ దొరుకుతోంది.
– కుమార్, చింతల్
కాటన్ బ్యాగ్లే కొంటున్నరు
ఏర్పాటు చేసి రెండు వారాలే అయినా జనం నుంచి మంచి స్పందన వస్తోంది. డైలీ చాలా మంది బ్యాగులు లేకుండానే మార్కెట్కు వస్తుంటారు. మమ్మల్ని ప్లాస్టిక్ బ్యాగులు ఇవ్వమని అడుగుతుంటారు. ఏటీబీ మెషీన్ను పెట్టిన తర్వాత దాదాపు అంతా కాటన్ బ్యాగ్లు తీసుకుంటున్నారు.
– మహేశ్, వ్యాపారి, బాలానగర్ ఫ్రూట్ మార్కెట్
