బాలీవుడ్ యంగ్ హీరో వరుణ్ ధావన్ నటించిన లేటెస్ట్ సినిమా 'భేడియా'. ఈ మూవీ ట్రైలర్ వచ్చేసింది. సర్ ప్రైజింగ్ హారర్ కామెడీ ఎలిమెంట్స్ తో సాగిన ఈ ట్రైలర్ ఆద్యంతం అలరిస్తోంది. ఇండియన్ స్క్రీన్ మీద తొలి క్రియేచర్ కామెడీ జానర్ మూవీగా 'భేడియా'ను దర్శకుడు అమర్ కౌశిక్ తెరకెక్కిస్తున్నాడు. ఈ సినిమా తెలుగులో "తోడేలు" పేరుతో రాబోతుంది. ఇందులో కృతి సనన్ హీరోయిన్ గా నటిస్తోంది. జియో స్టూడియోస్ సమర్పణలో మ్యాడాక్ ఫిలింస్ సంస్థ ఈ చిత్రాన్ని నిర్మిస్తోంది. దినేష్ విజాన్ నిర్మాతగా వ్యవహరిస్తున్నాడు. హీరో వరుణ్ ధావన్ ఇండస్ట్రీలోకి వచ్చి పదేళ్లవుతున్న సందర్భంగా "తోడేలు" ట్రైలర్ ను మేకర్స్ విడుదల చేశారు. 'భేడియా' హిందీ, తెలుగు, తమిళ భాషల్లో నవంబర్ 25న రిలీజ్ కానుంది.
అరుణాచల్ అడవుల నేపథ్యంగా 'భేడియా' కథ సాగుతుంది. ఇక ట్రైలర్ విషయానికొస్తే.. ఇక్కడి వైల్డ్ యానిమల్ గాయపర్చిన తర్వాత కథానాయకుడు భాస్కర్ ప్రవర్తనలో అనూహ్య మార్పులు వస్తాయి. అతను ఎందుకలా ప్రవర్తిస్తున్నాడో తెలుసుకునేందుకు స్నేహితులు ప్రయత్నిస్తుంటారు. అతని వైల్డ్ బిహేవియర్ కు కారణాలేంటో తెలుసుకునే క్రమంలో.. ఆసక్తికర మలుపులతో సర్ ప్రైజింగ్ గా స్టోరీ ముందుకు సాగుతుంది. ఈ కథను అత్యున్నత సాంకేతిక విలువలతో హాలీవుడ్ స్థాయి గ్రాఫిక్స్ తో తెరకెక్కించినట్లు ట్రైలర్ చూస్తే తెలుస్తోంది. ఈ సినిమా కోసం టాప్ గన్ మెర్విక్, గాడ్జిలా వెర్సస్ కింగ్ వంటి హాలీవుడ్ చిత్రాలకు పనిచేసిన వీఎఫ్ఎక్స్ కంపెనీలు గ్రాఫిక్స్ డిజైన్ చేశాయి.
ఈ ట్రైలర్ విడుదల సందర్భంగా నిర్మాత దినేష్ విజాన్ మాట్లాడుతూ.."ఈ కథను పైనల్ చేసినప్పుడే ఈ చిత్రాన్ని ఇంత భారీ స్కేల్ లో నిర్మించాలని నిర్ణయించాం. దేశ విదేశాల్లో పేరున్న వీఎఫ్ఎక్స్ కంపెనీలు మా చిత్రానికి పని చేశాయి. ఆ విజువల్ క్వాలిటీని ట్రైలర్ లో చూడొచ్చు. కుటుంబంతో సహా ప్రేక్షకులు థియేటర్ లో ఎంజాయ్ చేసేలా ఈ సినిమా ఉంటుంది" అన్నారు.
దర్శకుడు అమర్ కౌశిక్ మాట్లాడుతూ.. "భేడియా ట్రైలర్ లో మీకు చూపించిన సర్ ప్రైజింగ్ ఎలిమెంట్స్ కొన్నే... థియేటర్ లో ఈ సినిమాను ఇంకా బాగా ఎంజాయ్ చేస్తారు.కథా కథనాలు సర్ ప్రైజ్ చేస్తాయి. భయపెడుతూనే నవ్విస్తుంటాయి. ఈ సినిమాను త్వరలో మీ ముందుకు తీసుకురానుండటం సంతోషంగా ఉంది" అని చెప్పారు. పాన్ ఇండియా స్థాయిలో హిందీ, తెలుగు, తమిళ భాషల్లో నవంబర్ 25న భేడియా (తోడేలు) ప్రేక్షకుల ముందుకొచ్చేందుకు సిద్ధమవుతోంది. త్రీడీ ఫార్మేట్ లోనూ ఈ సినిమా విడుదలవుతుండటం విశేషం.
