- ఒక్కసారిగా పడిపోతున్న ప్లేట్ లెట్స్
- హాస్పిటల్స్లో పెరుగుతున్న డెంగీ కేసులు
- రోజుకు ఐదు నుంచి ఆరు వరకు నమోదు
" హైటెక్ సిటీకి చెందిన ఓ వ్యక్తి పది రోజుల కిందట తీవ్ర జ్వరంతో బాధపడుతూ ప్రైవేటు ఆస్పత్రికి వెళ్లాడు. అప్పటికే అతను పోస్ట్ కొవిడ్ పేషెంట్. డాక్టర్ మళ్లీ టెస్ట్ చేయగా నెగెటివ్ వచ్చింది. దీంతో మెడిసిన్ ఇచ్చి పంపించాడు. రెండు రోజుల తర్వాత ఒక్కసారిగా అతడికి సీరియస్ కావడంతో కుటుంబసభ్యులు వెంటనే హాస్పిటల్కు తీసుకెళ్లారు. ఇతర టెస్ట్లు చేస్తే ప్లేట్ లెట్స్ పడిపోయినట్టు తేలింది. 3 రోజులు అబ్జర్వేషన్లో ఉంచుకుని నయం అయ్యాక తిరిగి డిశ్చార్జ్చేశారు.’’
హైదరాబాద్, వెలుగు : కొవిడ్ పేషెంట్లను డెంగీ భయపెడుతోంది. తీవ్ర జర్వం వచ్చి ఒక్కసారిగా ప్లేట్ లెట్స్ పడిపోతున్నాయి. ఇలాంటి కేసులు గ్రేటర్లో రెండు వారాలుగా ఎక్కువగా నమోదవుతున్నాయి. కరోనా వచ్చిపోయిన వారు, కరోనా పాజిటివ్ పేషెంట్లు ఫీవర్తో ఆస్పత్రులకు వెళ్తుండగా డాక్టర్లు ముందుగా ఆర్టీపీసీఆర్ టెస్ట్ చేసి రిజల్ట్ ని బట్టి వేరే టెస్టులు చేస్తుండగా డెంగీ సోకినట్లు తేలుతోంది. వెంటనే అబ్జర్వేషన్లో ఉంచుకుని ట్రీట్ మెంట్అందిస్తున్నారు. సిటీలో ఇలాంటి కేసులు సర్కార్దవాఖానల కంటే ప్రైవేటులోనే ఎక్కువగా నమోదవుతున్నాయి. డైలీ ఓపీకి వచ్చే పేషెంట్లలో ఐదారుగురు వీళ్లే ఉంటున్నారు. కరోనా వచ్చిపోయిన వారితో పాటు, ప్రస్తుతం పాజిటివ్ పేషెంట్లకు కూడా డెంగీ సోకితే డేంజరేనని డాక్టర్లు పేర్కొంటున్నారు.
ఒకేసారి రెండు ఇన్ఫెక్షన్ల బారినపడితే
వానాకాలంలో డెంగీ, టైఫాయిడ్, మలేరియా లాంటి సీజనల్ వ్యాధులు సాధారణమే. కొవిడ్ సెకండ్ వేవ్లో చాలా మంది వైరస్ బారిన పడ్డారు. వీరిలో చాలామందికి డెంగీ అటాక్ అవుతుందని, వచ్చిన వారిలో ప్రమాద తీవ్రత ఎక్కువగా ఉంటుందని డాక్టర్లు హెచ్చరిస్తున్నారు. ఒకేసారి కరోనా, డెంగీ రెండు ఇన్ఫెక్షన్ల బారినపడితే వారిని కో -ఇన్ఫెక్షన్ పేషెంట్గా గుర్తించి ట్రీట్మెంట్ అందిస్తున్నామన్నారు. వీరిలో ప్లేట్ లెట్స్ ఒక్కసారిగా పదివేల కంటే తక్కువకు పడిపోయే అవకాశం కూడా ఉండొచ్చంటున్నారు. డెంగీ, కరోనాలో జ్వరం, తలనొప్పి, దగ్గు, జలుబు, విరేచనాలు సాధారణంగా ఉంటాయంటున్నారు. డెంగీ వస్తే 4 రోజుల తర్వాత తగ్గిపోతుందని, జ్వరం తగ్గాక పేషెంట్లు వెంటనే ఇంటికెళ్లకుండా మరో రెండ్రోజులు ఆస్పత్రిలో ఉండాలంటున్నారు. ఇన్ఫెక్షన్అప్పుడే మొదలవుతుందని, వెంటనే ట్రీట్మెంట్ అందించాల్సి ఉంటుందని చెప్తున్నారు.
అవయవాలపై తీవ్ర ప్రభావం
కో -ఇన్ఫెక్షన్ పేషెంట్లలో అవయవాలపై తీవ్ర ప్రభావం చూపిస్తుంది. లంగ్స్, లివర్, కిడ్నీ, హార్ట్ ప్రాబ్లమ్స్వస్తాయి. గర్భిణులు, వృద్ధులు చాలా జాగ్రత్తగా ఉండాలి. దీర్ఘకాలిక జబ్బులతో బాధపడే వారిలో కో- ఇన్ఫెక్షన్అటాక్ తీవ్రత చాలా ఎక్కువగా ఉంటుంది. ప్లేట్ లెట్స్ పడిపోవడం, ముక్కు, మలద్వారం నుంచి రక్తం పడడం జరిగితే ఆలస్యం చేయకుండా వెంటనే ఆస్పత్రికి వెళ్లి ట్రీట్మెంట్తీసుకోవాలని డాక్టర్లు సూచిస్తున్నారు.
పోస్ట్ కొవిడ్ పేషెంట్లకు తీవ్రత ఎక్కువే..
హాస్పిటల్లో ఈ నెల1 నుంచి ఇప్పటి వరకు మొత్తం19కి పైగా డెంగీ కేసులు నమోదయ్యాయి. పోస్ట్ కొవిడ్ పేషెంట్లకు డెంగీ వస్తే తీవ్రత ఎక్కువ ఉంటుంది. హెల్త్ కండీషన్ పై అలర్ట్గా ఉండాలి. పేషెంట్లు ఎక్కువగా ఇంట్లోనే ఉండాలి. చుట్టుపక్కల మురుగు, నీరు నిల్వ ఉండకుండా చూసుకోవాలి.
- డాక్టర్ శంకర్, సూపరింటెండెంట్, ఫీవర్ హాస్పిటల్
ఓపీలో 70 శాతం ఇవే కేసులు
రెండు వారాలుగా ప్రతిరోజు ఓపీలో 70 శాతం డెంగీ కేసులే ఉంటుండగా 50 కేసులు నమోదు అయ్యాయి. పోస్ట్కొవిడ్పేషెంట్లలో ప్లేట్ లెట్స్ పడిపోవడం ఎక్కువగా ఉంటుంది. వాళ్లు చాలా జాగ్రత్తగా ఉండాలి. డెంగీ వస్తే మొదటి నాలుగు రోజులు తలనొప్పి, విరేచనాలు, ఫీవర్ ఉంటుంది. ఆలస్యం చేయకుండా ఆస్పత్రికి వెళ్లి డాక్టర్అబ్జర్వేషన్ లో ఉండాలి. పబ్లిక్ ప్లేసెస్కు ఎక్కువగా వెళ్లొద్దు . ఇంట్లో శుభ్రంగా ఉండేలా చూసుకోవాలి.
- డాక్టర్ రాహుల్ అగర్వాల్, జనరల్ ఫిజిషియన్, కేర్ హాస్పిటల్స్
