జహీరాబాద్, వెలుగు: సంగారెడ్డి జిల్లా జహీరాబాద్ నియోజకవర్గంలోని పలు ప్రాంతాల్లో బుధవారం స్వల్పంగా భూమి కంపించింది. మధ్యాహ్నం12:30 గంటల ప్రాంతంలో కోహిర్ మండలం మనియార్పల్లి, బిలాల్ పూర్, బడంపేట్, జహీరాబాద్ మండలం రంజోల్ గ్రామ సమీపంలోని బాబానగర్ తదితర గ్రామాల్లో కొన్ని సెకండ్ల పాటు భూమి కంపించింది. దీంతో జనాలు ఇండ్లలోంచి బయటకు పరుగులు తీశారు. కొద్దిసేపటి వరకు ఏం జరుగుతుందో అర్థం కాలేదని చెప్పారు. బయటనే ఉండి తర్వాత ఎవరి ఇండ్లలోకి వారు వెళ్లారు.
