శంషాబాద్, వెలుగు: ‘గిఫ్టెడ్ చిల్డ్రెన్ స్కీమ్’ కింద జీఎంఆర్ వరలక్ష్మి ఫౌండేషన్లో పేదలకు అతి తక్కువ ఖర్చుతోనే పెద్ద చదువులు చెబుతున్నారని ఉపరాష్ట్రపతి వెంకయ్య నాయుడు చెప్పారు. ఆదివారం శంషాబాద్ ఎయిర్పోర్ట్ పరిధిలో నిర్వహిస్తున్న జీఎంఆర్ వరలక్ష్మి సెంటర్ ఫర్ ఎంపవర్మెంట్ అండ్ లైవ్లీహుడ్ను ఆయన సందర్శించారు. జీఎంఆర్ ఫౌండేషన్తో కలిసి చిన్మయ మిషన్ నడుపుతున్న జీఎంఆర్ చిన్మయ స్కూల్నూ పరిశీలించారు. చదువులను ఆపేసిన పేద స్టూడెంట్లకు ఒకేషనల్ ట్రైనింగ్ అందించి వారికి ఉపాధి అందించడంలో ఫౌండేషన్ కృషి చేస్తోందని కొనియాడారు. ట్రైనింగ్ తీసుకుంటున్న స్టూడెంట్లు, జనపనార బ్యాగుల తయారీ కోసం శిక్షణ తీసుకుంటున్న మహిళలతో ఆయన మాట్లాడారు. ఎయిర్పోర్ట్ దగ్గర నివసించే 100 మంది పేద స్టూడెంట్ల ఖర్చు భరించడం మంచి విషయమన్నారు. దేశంలోని 20 చోట్ల స్థానిక ప్రజల కోసం అభివృద్ధి కార్యక్రమాలు చేపడుతోందన్నారు.
