మామూలుగా బొమ్మ గీయాలంటే పేపరు, పెన్సిల్ కావాలి. అదే కేన్వాస్ మీద అయితే కుంచె, కలర్లు కావాలి. కానీ, అవేవీ లేకుండా కొంచెం కొత్తగా బొమ్మ గీస్తే ఎలా ఉంటుంది? ఇదిగో ఇలా ఉంటుంది. ఈ బొమ్మల్లో కొత్తదనం అదే. ఏ రంగులు, కుంచె లేకుండానే వీటిని గీశారు. ‘బ్యాక్టీరియా’తో ఈ బొమ్మలను చెక్కారు. అమెరికన్ సొసైటీ ఆఫ్ మైక్రోబయాలజీ (ఏఎస్ఎం) గత ఐదేళ్లుగా ‘అగార్ (బ్యాక్టీరియా బతికేందుకు అవసరమయ్యే ఓ ప్రొటీన్) ఆర్ట్ పోటీ’లను నిర్వహిస్తోంది. ఈ ఏడాది పోటీలకు వచ్చిన ఫొటోలివి. సైంటిస్ట్ (ప్రొఫెషనల్), నాన్సైంటిస్ట్ (మేకర్), చిల్డ్రెన్ కేటగిరీల్లో 347 ఎంట్రీలొచ్చాయి. ఆ ఎంట్రీల్లోకెల్లి నవంబర్ 20న విజేతలను ప్రకటించారు ఏఎస్ఎం జడ్జిలు. ప్రొఫెషనల్ కేటగిరీలో కోయి ఫిష్ అండ్ లోటస్ ఫ్లవర్ బొమ్మ గీసిన ఓక్లాండ్ యూనివర్సిటీ సైంటిస్ట్ అర్వా హదీద్ ఫస్ట్ ప్రైజ్ గెలుచుకున్నారు. పీపుల్స్ చాయిస్ అవార్డు సిన్ల్యాబ్ హంగరీ లిమిటెడ్కు చెందిన జిటా పోస్తెన్యీ గీసిన హంగేరియన్ ఫోక్ ఆర్ట్, మేకర్ కేటగిరీలో కోరే అబ్రామ్ గీసిన బ్యాక్టీరియల్ సెల్ఫ్ పోట్రెయిట్, చిల్డ్రెన్ కేటగిరీలో కేట్ లిన్ గీసిన ద సర్కిల్ ఆఫ్ లైఫ్ను వరించింది.
ఎట్ల మొదలైంది..?
సోషల్ మీడియాలో ప్రారంభమైన పిక్ ఆఫ్ ద డే సిరీస్లో భాగంగా ఏఎస్ఎం అగార్ ఆర్ట్ కంటెస్ట్ మొదలైంది. 2014 డిసెంబర్లో రోసిత్స తశ్కోవా అనే వ్యక్తి అగార్ ప్లేట్లో బ్యాక్టీరియాతో గీసిన బొమ్మ, సోషల్ మీడియాలో వైరల్ కావడంతో ఏఎస్ఎం ఈ పోటీల ఆలోచన చేసింది. ఆ తర్వాత ఎండా కాలానికే పోటీలను మొదలుపెట్టారు. సైంటిస్టులు క్రియేటివ్గా కూడా ఆలోచించగలరని ప్రపంచానికి నిరూపించేందుకే ఈ పోటీలు పెట్టినట్టు ఏఎస్ఎం పబ్లిక్ అవుట్రీచ్ మేనేజర్ కేథరీన్ లోంటోక్ తెలిపారు. తొలి ఏడాది పెట్టిన పోటీలకు 84 ఎంట్రీలొచ్చాయన్నారు. అప్పటి నుంచి ఎంట్రీలు పెరుగుతున్నాయన్నారు. త్రీడీ అగార్ టెక్నిక్లో బ్యాక్టీరియాతో మంచి బొమ్మలు గీసి పంపుతున్నారని చెప్పారు.
ఎట్ల గీస్తరు?
మిగతా బొమ్మలు, పెయింటింగ్స్తో పోలిస్తే ఇది కొంచెం డిఫరెంట్ వ్యవహారం. బ్యాక్టీరియాతో బొమ్మలు గీయాలంటే ముందే ప్లానింగ్ ఉండాలి. కంపోజిషన్, బ్యాక్టీరియా పెరుగుదలకు ఉపయోగపడే మీడియం, కలర్ల ఎంపిక బాగుండాలి. మామూలు బొమ్మల్లాగా గీయగానే ఆ బొమ్మ కనిపించేయదు. కొంచెం ఓపిక పట్టాలి. ఎందుకంటే దాని వెనక చాలా ప్రాసెస్ ఉంటుంది మరి. మామూలుగా మైక్రోబయాలజీ ల్యాబుల్లో పెట్రి డిష్లలో బ్యాక్టీరియాను పెంచుతుంటారు. దానికి అగార్ను తీసుకుని ఉడికిస్తారు. దానిని పెట్రి డిష్లలో పోసి జెల్లాగా మారే వరకు వేచి చూస్తారు. ఆ తర్వాత బ్యాక్టీరియాను దాంట్లోకి ఇనాక్యులేట్ చేస్తారు. ఆ తర్వాత అందులో బ్యాక్టీరియా వృద్ధి చెంది కాలనీలుగా ఏర్పడడానికి రెండు రోజుల వరకు టైం పడుతుంది. ఈ బొమ్మలు గీయడమూ అంతే. అయితే, బ్యాక్టీరియాను ఇనాక్యులేట్ చేసేటప్పుడు, ఏదో చేశాంలే అని కాకుండా గీయాలనుకుంటున్న బొమ్మను బ్యాక్టీరియాతో కరెక్ట్గా ఇనాక్యులేట్ చేయాల్సి ఉంటుంది. కొన్ని బ్యాక్టీరియాలు సహజంగానే రంగులతో ఏర్పడుతుంటాయి. వేరే కలర్లు కావాలంటే అందుకు తగ్గ బ్యాక్టీరియాను ఎంచుకోవాల్సి ఉంటుంది. స్ట్రెప్టోమైసిస్ (బ్లూ, గ్రీన్), ఈ–కొలి (మట్టి రంగు), మట్టిలో ఉండే వివిధ బ్యాక్టీరియాలు పర్పుల్, యెల్లో రంగులను ఇస్తుంటాయి. రంగులకు తగ్గట్టు ఆర్టిస్టులు ఆయా బ్యాక్టీరియాలను ఎంచుకుని ఈ బొమ్మలు గీశారు.
