ఆర్టీసీ ఎండీగా సజ్జనార్ బాధ్యతలు చేపట్టినప్పటి నుంచి ప్రయాణికుల్ని ఆకర్షించే విధంగా అనేక నిర్ణయాలు తీసుకుంటున్నారు. ప్రయాణికుల సమస్యల పట్ల కూడా ఆయన వెంటనే స్పందిస్తున్నారు. అవసరమైన చర్యలు కూడా తీసుకుంటున్నారు. అయితే తాజాగా సజ్జనార్ మరో అనూహ్య ప్రకటన చేశారు. ఇటీవల ఆర్టీసీ బస్సులో సురక్షితంగా ప్రసవించిన ఇద్దరు మహిళలకు ఆయన శుభవార్త చెప్పారు. గత నెల 30న నాగర్ కర్నూలు, ఈనెల ఏడవ తేదీన సిద్ధిపేట ఆర్టీసీ బస్సుల్లో ప్రయాణిస్తూ మార్గమధ్యలో గర్భిణులు బిడ్డలకు జన్మనిచ్చారు. ఆర్టీసీ బస్సులో వీరు ప్రసవించారు. దీంతో వెంటనే ఆర్టీసీ సిబ్బంది 108కు సమాచారం అందించి ప్రసవించిన మహిళలను ఆస్పత్రిలో చేర్పించారు. వారంతా క్షేమంగా ఉన్నట్లు సజ్జనార్ ప్రకటించారు. అంతేకాకుండా బస్సులో జన్మించిన ఇద్దరు పిల్లలకు జీవితాంతం బస్సులో ప్రయాణం చేసేందుకు పాస్ లు అందించినట్లు ప్రకటించారు సజ్జనార్.
