అది పబ్లిక్ ప్లేసే. చుట్టూ జనం ఉంటరు. రోడ్లపై వందలాది వాహనాలూ తిరుగుతనే ఉంటయి. కానీ.. ఆటోలో ఉన్నా, బస్సులో ఉన్నా.. చివరికి సొంత వెహికిల్ పై ఉన్నా సరే.. అది రోడ్డయితే చాలు.. ఏ వైపు నుంచి ఏ మృగాడు మీదపడ్తడో అని ఆడపిల్లలు బిక్కుబిక్కుమంటూ గడుపుతున్న కాలమిది. మధ్యప్రదేశ్లోని భోపాల్, గ్వాలియర్, రాజస్థాన్లోని జోధ్పూర్ నగరాల్లో ఈ భయం ఇంకా ఎక్కువగా ఉందట. ఆడపిల్లలు బయటకెళ్లాలంటేనే భయపడాల్సిన పరిస్థితులు ఉన్నాయట. కొరియా ఇంటర్నేషనల్ కోఆపరేషన్ ఏజెన్సీ (కోయికా), ఎన్జీవో ఏషియా ఫౌండేషన్ సంస్థలు సర్వే చేసి ఈ విషయాన్ని చెబుతున్నాయి. ఈ మూడు నగరాల్లో జరిగిన 219 సర్వేల సమాచారాన్ని విశ్లేషించిన ఈ సంస్థలు ఇటీవల ఒక నివేదికను విడుదల చేశాయి. ఈ మూడు నగరాల్లో జన సంచారం తక్కువగా ఉండే ప్రదేశాలు, సురక్షితం కాని ఏరియాలు ఎక్కువగా ఉన్నాయని, అందుకే ఇక్కడి మహిళలు తీవ్ర అభద్రతను ఫీలవుతున్నారని ఈ నివేదిక తెలిపింది. బస్సులు, షేరింగ్ ఆటోల్లో వెళుతున్నప్పుడు స్టూడెంట్లు, పెళ్లికాని యువతులను ఎక్కువగా ఈవ్టీజింగ్ చేస్తున్నారని పేర్కొంది. మొత్తంగా స్కూలు, కాలేజీ అమ్మాయిలు, పెళ్లికాని యువతులకు ఈ నగరాల్లో లైంగిక వేధింపుల ముప్పు చాలా ఎక్కువగా ఉందని నివేదిక ఆందోళన వ్యక్తం చేసింది.
నివేదికలోని కీలక అంశాలు ఇవే..
- భోపాల్, గ్వాలియర్, జోధ్పూర్ సిటీల్లో జనసంచారం తక్కువగా ఉండి, భద్రంగా లేని ఏరియాలు ఎక్కువగా ఉన్నాయని, వెళ్లాలంటేనే భయమేస్తోందని 89% మంది మహిళలు చెప్పారు.
- పబ్లిక్ ట్రాన్స్పోర్ట్కు చెందిన బస్సుల్లోనూ కొన్నిసార్లు జనం ఎవరూ ఉండటం లేదని, అలాంటి సమయంలో చాలా భయమేస్తోందని 63% మంది చెప్పారు.
- డ్రగ్స్ దందాలు, వైన్ షాపులు నిర్వహించే ప్రాంతాలకు వెళ్లాలన్నా టెన్షన్ పడాల్సి వస్తోందని 86% మంది వెల్లడించారు.
- చాలా ఏరియాల్లో భద్రత లేదని అటువైపు వెళ్లేందుకే జంకుతున్నామని 68% మంది తెలిపారు.
- ఈ మూడు సిటీల్లో గర్ల్ స్టూడెంట్లకు 57.1%, పెళ్లికాని యువతులకు 50.1% లైంగిక వేధింపుల ముప్పు ఎక్కువగా ఉంది.
- అమ్మాయిలపై కామెంట్లు చేయడం, ఈలలు వేయడం, వెకిలిగా చూడటం, అసభ్యంగా తాకడం వంటి చర్యలకు పాల్పడుతున్నా, అధికారులు సీరియస్ లైంగిక దాడులుగా చూడట్లేదు.
- పబ్లిక్ ట్రాన్స్పోర్ట్లో ప్రయాణిస్తున్నప్పుడు వేధింపులు కామన్అయిపోయాయని 50% మంది, మార్కెట్ ప్రాంతాల్లో వేధింపులు ఎక్కువగా ఎదుర్కొన్నామని 39% మంది చెప్పారు.
- రోడ్డుపై వెళుతున్నప్పుడు వేధింపులు ఎదుర్కొంటున్నామని 26% మంది, బస్టాపుల్లో నిలబడినప్పుడు వేధిస్తున్నారని16% మంది తెలిపారు.
