ఒక్క నల్లగొండ డివిజన్లోనే 2,188
సర్కారుకు భారీగా సమకూరిన ఆదాయం
రేపటిదాకా దరఖాస్తుకు అవకాశం
హైదరాబాద్, వెలుగు: మద్యం దుకాణాల లైసెన్సులకు మస్తు మంది దరఖాస్తు చేసుకుంటున్నరు.. రాష్ట్రంలో మొత్తం 2,216 షాపులు ఉండగా.. ఇప్పటికే 10,926 దరఖాస్తులు అందాయని అధికారులు చెబుతున్నారు. సోమవారం ఒక్కరోజే 6,711 అప్లికేషన్లు వచ్చాయన్నారు. డివిజన్ల వారీగా చూస్తే నల్లగొండ డివిజన్లో అత్యధికంగా 2,188 దరఖాస్తులు అందాయని చెప్పారు. ఏపీలో దశలవారీగా మద్యనిషేధం అమలు చేస్తామని అక్కడి ప్రభుత్వం ప్రకటించడంతో సరిహద్దుల్లోని ప్రాంతాలకు పోటాపోటీగా దరఖాస్తు చేస్తున్నారని అన్నారు.
నల్లగొండ తర్వాత వరంగల్ డివిజన్లో 2,071 అప్లికేషన్లు రాగా, అత్యల్పంగా హైదరాబాద్ డివిజన్లో 237 దరఖాస్తులు మాత్రమే అందాయన్నారు. ఒక్కో దరఖాస్తుకు రూ.2 లక్షలు నాన్ రిఫండబుల్ ఫీజు వసూలు చేయడంతో ప్రభుత్వ ఖజానాకు భారీగా ఆదాయం సమకూరింది. బుధవారం వరకు గడువు ఉండడంతో మరిన్ని దరఖాస్తులు అందే అవకాశం ఉందని అధికారులు చెప్పారు.