చిన్న చిన్న బాధలకే ఎంత కష్టాన్నిచ్చావు దేవుడా..! అని నిరాశపడిపోతారు కొందరు. అన్నీ బాగున్నా ఏ చిన్న ఇబ్బందికో ఛీ ఇదేం జీవితం అంటూ డీలా పడిపోతారు మరికొందరు.
ఈ చిన్నారిని చూస్తే ఎటువంటి వారికైనా జీవితంపై కొత్త ఆశలు పుట్టకమానవు. ఎంత కిందికి పడినా మళ్లే లేచి పరిగెత్తొచ్చనే ధీమా వస్తుందేమో!
ఆకలిని ఓడించాలని పట్టు
ఈ చిన్నారి పేరు వాసిలినా క్నుట్జెన్. రష్యాకు చెందిన ఈ పాపకు పుట్టుకతోనే రెండు చేతులూ లేవు. ఆ పసితనంలో తనంతట తానే ఆహారం తీసుకునేందుకు ఒక పోరాటమే చేస్తోంది. కాలి వేళ్ల మధ్యలో ఫోర్క్ పెట్టుకుని ఫుడ్ తీసుకోవడం ప్రాక్టీస్ చేస్తోంది. తొలి ప్రయత్నంలో నోటికి అందకున్నా ఏ మాత్రం నిరాశ, చిరాకు పడలేదు. విధిని ఎదిరించి.. ఆకలితో పోరాటంలో గెలిచింది. చిరునవ్వు ముఖంతోనే మళ్లీ ఇంకోలా ఆహారాన్ని అందుకుంది. ఈ పసిపాప ఇబ్బందిని చూసి ఎవరికైనా కళ్లు చమర్చక మానవు. ఆ ప్రయత్నం ఎంతటి నిరాశావాదిలోనైనా ఆశలు చిగురింప చేస్తుంది.
ఆనంద్ మహింద్రా కంటతడి
ఈ వీడియో మిత్రుల ద్వారా వాట్సాప్ లో వ్యాపార దిగ్గజం ఆనంద్ మహింద్రాకు చేరింది. ఇటీవల తరచూ తన మనవడితో ఆడుకుంటూ గడుపుతున్న ఆయనకు ఆ చిన్నారి పరిస్థితి చూసి కళ్లు చమర్చాయి. ఈ విషయాన్ని తెలియజేస్తూ ఆయన ట్వీట్ చేశారు.
‘‘జీవితం ఏమిచ్చినా ఒక గిఫ్టులా స్వీకరించాలి. ఎటువంటి లోపాలు, సవాళ్లను అయినా సరే మనం ఎలా మలుచుకుంటామనే దానిపై ఆధారపడి ఉంటుంది’’ అని అన్నారాయన.
Been seeing my grandson recently, which is why I couldn’t restrain the tears when I saw this whatsapp post. Life, whatever its imperfections & challenges, is a gift; it’s up to us to make the most of it. Images like this help me retain my unfailing optimism pic.twitter.com/AXRYAqsuG0
— anand mahindra (@anandmahindra) September 21, 2019
