హన్మకొండ సిటీ, వెలుగు: అసలే నిరుపేద కుటుంబం. తల్లిదండ్రులకు పెద్దగా చదివించే స్థోమత లేదు. అయినా తన ఇష్టాన్ని మానుకోలేదు. ఓ వైపు ఫుడ్డెలివరీ చేస్తూనే.. తనకు ఇష్టమైన హోటల్ మేనేజ్మెంట్ కోర్సులో చేరిందా యువతి. పని చేసుకుంటూనే స్టడీస్ కంటిన్యూ చేసింది. ఈ విషయం తెలుసుకున్న ఆమె చదివే ఇనిస్టిట్యూట్మేనేజ్మెంట్ కోర్సుకు అయ్యే పూర్తి ఫీజును మాఫీ చేసింది. హన్మకొండ పరిధిలోని బాలసముద్రానికి చెందిన మామిడిపల్లి రవి, సాంబ కూతురు రచన. కూలి పనులు చేసుకుంటూ ఆమెను చదివించారు. పై చదువుల కోసం తల్లిదండ్రులపై భారం వేయకూడదని హైదరాబాద్లోని వివిధ షాపుల్లో పనిచేస్తూ.. సిటీలోని చెన్నైస్ అమిర్త ఇంటర్నేషనల్ ఇనిస్టిట్యూట్లో హోటల్మేనేజ్ మెంట్ కోర్సు చేరింది. ఆన్లైన్ క్లాసులకు అటెండ్అవుతూ చదువుకొంటోంది. షాపుల్లో వచ్చే జీతం చాలకపోవడంతో జొమాటోలో ఫుడ్ డెలివరీ గర్ల్గా చేరింది. ఆ విషయం సోషల్ మీడియాలో వైరల్ కావడంతో తోటి విద్యార్థులు మేనేజ్మెంట్దృష్టికి తీసుకెళ్లారు. స్పందించిన కాలేజీ యాజమాన్యం రచన చదువులకు అయ్యే రూ.75 వేల ఫీజును మాఫీ చేసింది. ఉద్యోగం సాధించే వరకు సహకారం అందిస్తామని ఇనిస్టిట్యూట్ చైర్మన్ ఆర్.భూమినాథన్ తెలిపారు.
