రేషన్​ షాపుల్లో సన్నబియ్యం

• పంపిణీకి రాష్ట్ర సర్కారు​ సన్నాహాలు
• ఎలా ముందుకెళ్లాలనే దానిపై సమగ్ర రిపోర్ట్​ ఇవ్వాలని అధికారులకు సీఎం రేవంత్​ ఆదేశం!
• రాబోయే ఖరీఫ్​లో రైతులు సన్నాలు సాగుచేసి మరింత లాభపడేలా ఆలోచన
• రేషన్​ బియ్యం రీసైక్లింగ్​కూ చెక్​​

హైదరాబాద్, వెలుగు : పేదోళ్లకు రేషన్ ​షాపుల ద్వారా సన్నబియ్యం పంపిణీ చేయాలని సీఎం రేవంత్​ రెడ్డి నిర్ణయం తీసుకున్నారు. రేషన్​దుకాణాల్లో రాష్ట్ర రైతులు పండించిన సన్నబియ్యం అందించేందుకు ఎలా ముందుకు వెళ్లాలనే దానిపై రిపోర్ట్ ఇవ్వాలని అధికారులను ఆదేశించినట్టు తెలిసింది. రాష్ట్రంలో సన్నాలు, దొడ్డు రకం వరి  ఏ మేరకు సాగవుతోంది ? ఇప్పుడు రాష్ట్రంలో సన్నబియ్యం వినియోగం ఎంత ? అనే వివరాలు సిద్ధం చేయాలని చెప్పినట్టు తెలిసింది. రేషన్​ షాపుల్లో సన్నబియ్యం పంపిణీ చేయడం ద్వారా అటు రైతులకు మంచి ధర అందివ్వడమే కాకుండా.. ఇటు రేషన్​కార్డు వినియోగదారులకు మేలు చేసినట్టు అవుతుందని సర్కారు భావిస్తోంది. 

ఫలితంగా రేషన్​ బియ్యం రీసైక్లింగ్, అక్రమ రవాణాకు అడ్డు పడనుంది. రాష్ట్రవ్యాప్తంగా  రేషన్​షాపుల్లో ప్రతిఏటా దాదాపు 24 లక్షల మెట్రిక్​ టన్నుల దొడ్డు బియ్యం పంపిణీ చేస్తున్నారు. ఇప్పుడు కొత్త రేషన్​కార్డులు ఇవ్వాలని నిర్ణయం తీసుకోగా.. ఈ కోటా మరికొంత పెరుగుతుందని భావిస్తున్నారు. దీంతో రానున్న ఖరీఫ్​లో రాష్ట్ర రైతులతో పెద్ద ఎత్తున సన్నాలు సాగు చేయించాలని రాష్ట్ర ప్రభుత్వం భావిస్తున్నది. ఇందుకోసం తగిన చర్యలు తీసుకోవాలని ఇప్పటికే వ్యవసాయ శాఖకు ఆదేశాలు జారీచేసింది. ఖరీఫ్​లో సాగయ్యే విస్తీర్ణాన్ని బట్టి.. రేషన్​ షాపుల్లో ఈ ఏడాదిలో ఎప్పుడు సన్న బియ్యం పంపిణీ  మొదలుపెట్టాలనే దానిపై నిర్ణయం తీసుకోనున్నారు .

రైతులకు మేలు చేసేలా.. పేదల కడుపు నిండేలా

రైతుల పంట ఉత్పత్తులు రేషన్​ షాపుల ద్వారా విక్రయాలు జరిపే ఆలోచన ఉన్నట్టు ఇటీవల సీఎం రేవంత్​రెడ్డి పేరొన్నారు. రాష్ట్రంలో వరి సాగును గమనిస్తే గత రెండేండ్లు ఖరీఫ్​లో 60 లక్షల ఎకరాలు దాటింది. అంటే మొత్తం సాగవుతున్న పంటల్లో 50 శాతం వరే కావడం గమనార్హం. అయితే ఇందులో సన్నాలు ఎంత సాగవుతున్నాయి ? దొడ్డు రకం ఎంత సాగవుతుంది? అనే లెక్క స్పష్టంగా లేదు. దీంతో ఈసారి సన్నాల సాగుపై లెక్క తీయాలని ప్రభుత్వం అనుకుంటున్నది. ఈ ఖరీఫ్​ నుంచే సన్నాల సాగును పెంచేలా చర్యలు కూడా తీసుకోనుంది. ప్రభుత్వ లెక్కల ప్రకారం యావరేజ్​గా 50 లక్షల మెట్రిక్​ టన్నుల సన్న వడ్లు పండిస్తే.. ఏడాది మొత్తం రేషన్​ షాపుల నుంచి సన్నబియ్యం పంపిణీ చేసేందుకు వీలుంటుంది. నేరుగా రైతుల నుంచి సన్నవడ్లను సేకరించి.. మిల్లింగ్ చేసి సివిల్​ సప్లయ్స్​ నుంచి రేషన్​ షాపుల ద్వారా ఇస్తే గిట్టుబాటు ధర కంటే ఎక్కువ వస్తుంది. కేంద్రం నిర్ణయించే కనీస మద్దతు ధర (ఎంఎస్పీ)కి సంబంధం లేకుండా అధిక ధరను కూడా రైతులకు ఇచ్చే వీలుంటుందని ప్రభుత్వం యోచిస్తున్నది. అదే సమయంలో బహిరంగ మార్కెట్​లో సన్న బియ్యానికి వెచ్చిస్తున్న దానికంటే తక్కువ ధరకే పేదలకు అందించనట్లువుతుందని సీఎం రేవంత్​ రెడ్డి భావిస్తున్నారు. ఈ క్రమంలో ఏమైనా ఆర్థిక భారం పడినా భరించేందుకు ప్రభుత్వం సిద్ధంగా ఉన్నట్టు సమాచారం.

రేషన్​ బియ్యం తినేది కొంతమందే

రాష్ట్రంలో దాదాపు 94 లక్షల తెల్ల రేషన్‌‌ కార్డులున్నాయి.  ఇందులో మూడు  కోట్లకు పైగా మంది లబ్ధిదారులు ఉన్నారు.  వీరి కోసం ప్రతి నెలా ప్రభుత్వం యావరేజ్​గా 2 లక్షల టన్నుల బియ్యాన్ని కేటాయిస్తున్నది. అయితే ఈ బియ్యంలో రేషన్ కార్డుదారులు ప్రతినెలా 20 శాతం మేర తీసుకోవడం లేదని తెలిసింది. ఇక రేషన్​ బియ్యం  తీసుకున్నవారిలోనూ 50 శాతంలోపు మందే వీటిని తినడానికి వినియోగించుకుంటున్నట్టు అంచనా వేస్తున్నారు. మిగిలినవారు తాము కొన్న రేషన్‌‌బియ్యాన్ని బ్లాక్‌‌ మార్కెట్‌‌లో కిలోకు రూ.10,  రూ.15 చొప్పున అమ్ముకుంటున్నారు. ఇవి రీసైక్లింగ్​ అవుతున్నాయి. మరికొన్నిసార్లు రేషన్​ బియ్యాన్ని అమ్మి బహిరంగ మార్కెట్‌‌లో రూ.40 – రూ.60 పెట్టి సన్న బియ్యాన్ని కొంటున్నారు. దీంతో ప్రభుత్వ లక్ష్యం నెరవేరడం లేదు. ఇటు పేదలపైనా ఆర్థిక భారం పడుతున్నది.  పైగా, రేషన్‌‌ బియ్యం భారీ మొత్తంలో పక్కదారి పడుతున్నదన్న ఆరోపణలున్నాయి. వ్యాపారులు ఈ బియ్యాన్ని లబ్ధిదారుల నుంచి కొని మిల్లర్లకు అమ్ముతున్నారన్న విమర్శలు ఉన్నాయి. మిల్లర్లు ఈ బియ్యాన్ని రీ సైక్లింగ్‌‌ చేసి సీఎమ్మాఆర్‌‌లో ఎఫ్‌‌సీఐకి అంటగడుతున్నారని  తెలుస్తోంది.