పుట్టలో వేలెడితే కుట్టడం సహజం. అమెరికాకి ఆ అవసరం లేదు. కుట్టాలనుకుంటే ఏదో ఒక కారణం వెతుక్కుంటుంది. ప్రస్తుతం ఇరాన్ విషయంలో అదే జరుగుతోంది. ఇరాన్లో పవర్ఫుల్ కమాండర్ ఖాసిం సులేమానీని చంపేసిన తర్వాత… ఆ దేశంపైకి దండయాత్రకు రంగం సిద్ధం చేసుకుంటోంది. అంతర్జాతీయంగా బోనులో నిలబడాల్సిన డొనాల్డ్ ట్రంప్ ఎదురు తిరుగుతున్నారు. సులేమానీ హత్యకు ప్రతీకారానికి పాల్పడితే జరగబోయేది యుద్ధమేనని సిగ్నల్స్ ఇస్తున్నారు. ప్రపంచం నలుమూలలాగల తన సైనిక స్థావరాల్ని అలర్ట్ చేశారు. ఎయిర్ బేస్లు, నావల్ బేస్లు, పోర్టులు, ఆర్మీ స్టేషన్లలో స్టాండ్బైగా ఉన్న ట్రూప్స్ని రెడీ చేస్తున్నారు. గల్ఫ్ ప్రాంతానికి అదనంగా 3,500 మందిని పంపుతున్నట్లుగా అమెరికా డిఫెన్స్ హెడ్క్వార్టర్స్ పెంటగాన్ ప్రకటించింది. ఇప్పటికే చాలా దేశాల్లో వేలాది అమెరికా సైనికులున్నారు. అయితే, కచ్చితమైన సంఖ్య తెలీదు.
అఫ్ఘాన్లో 14,000
ప్రపంచంలోనే అఫ్ఘానిస్థాన్ను చాలా స్ట్రాటజిక్ పాయింట్గా చెబుతారు. అక్కడ 14,000 మంది అమెరికా సైనికులున్నారు. ట్విన్ టవర్స్ని 2001లో విమానాలతో కూల్చేసిన తర్వాత అఫ్ఘానిస్థాన్లోని బగ్రామ్లో అమెరికా ఎయిర్బేస్ ఏర్పాటు చేసింది. అడ్వాన్స్డ్ వార్ జెట్లు దిగడానికి వీలుగా దీనిని డెవలప్ చేశారు. ఈ ఎయిర్ బేస్ నుంచి ఆసియా, ఆఫ్రికాల్లో ఏ మూలకు వెళ్లాలన్నా సమాన దూరం ఉంటుందని అంచనా. పోయిన నవంబర్లో అక్కడికి ట్రంప్ ఆకస్మికంగా వెళ్లినప్పుడే డిఫెన్స్ ఎనలిస్టులు అనుమానించారు.
ఇరాక్లో 6,000
ఇక్కడ 6,000 మంది అమెరికా సైనికులున్నట్లు అంచనా. బాగ్దాద్ చేరువలోని గ్రీన్ జోన్లో వీళ్లున్నారు. అమెరికా–ఇరాన్ల తగాదా మధ్య ఇరాక్ చిక్కుకుపోయింది. అక్కడున్న తమ సిబ్బందిని, అమెరికన్లను వెనక్కి వచ్చేయమని అమెరికా విదేశాంగ శాఖ ఆదేశించింది. గ్రీన్ జోన్పైనా, బలాడ్ ఎయిర్ బేస్పైనా రాకెట్ల దాడులు జరిగాయి. ఎవరికీ గాయాలు కాకపోయినా అమెరికా స్ఠావరాలపై రాకెట్లు పడడమనేది చాలా పెద్ద విషయం.
కువైట్లో 13,000
ఇక్కడ చాలా అమెరికా బేస్ స్టేషన్లున్నాయి. వాటిలో 13,000 మంది వరకు సైనికులుంటారని అంచనా. 1991లో గల్ఫ్ యుద్ధం జరిగాక అమెరికా–కువైట్ల మధ్య డిఫెన్స్ సహకార ఒప్పందం కుదిరింది.
ఎమిరేట్స్లో 5,000
హొర్ముజ్కి సంబంధం ఉన్న మరో దేశం యునైటెడ్ అరబ్ ఎమిరేట్స్. ఇది సౌదీ, అమెరికాలతో చాలా స్నేహంగా ఉంటుంది. అక్కడ 5,000 మంది వరకు అమెరికా ట్రూప్స్ ఉన్నాయి. అయితే, ఇటీవల ఇరాన్–అమెరికాల తగాదాల్లో తలదూర్చకుండా జాగ్రత్తలు తీసుకుంటోంది.
సిరియాలో 2,000
సుమారుగా 2,000 మంది వరకు అమెరికా సైనికులు సిరియాలో ఉండేవారు. పోయినేడాది అక్టోబరులో సైన్యాన్ని ట్రంప్ వెనక్కి వచ్చేయమనడంతో ప్రస్తుతం నామమాత్రంగా 800 వరకు ఉంటారని అంచనా. వీళ్లుకూడా సిరియా–జోర్డాన్ సరిహద్దుల్లో ఉంటారు. ఆ ప్రాంతంలో ఇరాన్ సపోర్టు చేస్తున్న గ్రూప్లు చాలా యాక్టివ్గా ఉంటాయి.
ఖతార్లో 13,000
ఈ దేశానిది చిత్రమైన వైఖరి. దీనికి అమెరికా మిత్రదేశాలైన సౌదీ అరేబియా, ఎమిరేట్స్లతో పడదు. పశ్చిమాసియాలోని అతి పెద్ద అమెరికా మిలిటరీ బేస్ ఖతార్లోనే ఉంది. అక్కడ సుమారుగా 13,000 మంది అమెరికా సైనికులుంటారని అంచనా. దీనిని డెవలప్ చేయడానికి ఖతార్ 108 కోట్ల డాలర్ల సాయాన్నికూడా ప్రకటించింది.
బహ్రెయిన్లో 7,000
అమెరికా నేవీ బేస్ బహ్రెయిన్లో ఏర్పాటు చేసుకుంది. అక్కడ 7,000 మంది సిబ్బంది ఉంటారని అంచనా. సౌదీకి భౌగోళికంగానూ, సంబంధాల పరంగానూ చాలా దగ్గరగా ఉన్న దేశం బహ్రెయిన్. ఇరాన్పై దాడి చేయాలన్న ట్రంప్ నిర్ణయాన్ని ఫుల్ సపోర్టు చేస్తోంది. 2011లో ఇరాన్ మద్దతున్న షియాలను
అణచివేసింది.
సౌదీలో 3,000
ఇరాన్తో సౌదీ అరేబియాకి చాలాకాలంగా పడడం లేదు. యెమన్లో ఈ రెండూ ఇతరులద్వారా యుద్ధం (ప్రాక్సీ వార్) జరుపుతున్నాయి. గల్ఫ్లో సౌదీ అరేబియా అమెరికాకి నమ్మినబంటులా ఉంది. ప్రస్తుతం సౌదీ అరేబియాలో 3,000 మంది అమెరికా సైనికులున్నారు. అక్టోబరులోనే అక్కడికి అదనపు బలగాల్ని పంపాలని అమెరికా నిర్ణయించింది. నవంబర్లో సౌదీఅరేబియాలోని చమురు, గ్యాస్ కేంద్రాలపై దాడులు జరిగినప్పుడు ఆ నెపాన్ని అమెరికా ఇరాన్పై నెట్టింది. ఇరాన్కూడా తనకు దీంతో ఎటువంటి సంబంధం లేదని తేల్చి చెప్పింది.
