మహాత్మ గాంధీ రాసిన పుస్తకాలు, లేఖలు, ఆయన చేసిన ప్రసంగాల కాపీల వంటివన్నీ ఇకపై ఒకే పోర్టల్లో అందుబాటులోకి రానున్నాయి. ఇందుకోసం ప్రత్యేకంగా ‘గాంధీపీడియా’ వెబ్ పోర్టల్ త్వరలో ప్రారంభం కానుంది. ఆర్టిఫిషియల్ ఇంటెలిజెన్స్ (ఏఐ) సాయంతో గాంధీజీకి సంబంధించిన సోషల్ నెట్వర్క్ను నిర్మిస్తున్నామని గాంధీనగర్, ఖరగ్పూర్ ఐఐటీలు, నేషనల్ కౌన్సిల్ ఆఫ్ సైన్స్ మ్యూజియమ్స్ (ఎన్ సీఎస్ఎం) వెల్లడించాయి. ఈ ప్రాజెక్టులో భాగంగా మొదట గాంధీజీ ఆత్మకథ ‘మై ఎక్స్ పెరిమెంట్స్ విత్ ట్రుత్’ పుస్తకాన్ని డిజిటైజేషన్ చేస్తున్నామని తెలిపాయి. ఈ ఏడాది గాంధీజీ 150వ జయంతి నేపథ్యంలో ఈ ప్రాజెక్టును చేపట్టామని ఐఐటీ ఖరగ్ పూర్ ప్రొఫెసర్ అనిమేశ్ ముఖర్జీ వెల్లడించారు. తొలిదశలో గాంధీజీ రాసిన 40 పుస్తకాలను డిజిటల్ రూపంలోకి మార్చి పోర్టల్లో పెడతామని ఆయన తెలిపారు. మార్చి 2024 నాటికి నాలుగు దశల్లో మొత్తం గాంధీజీకి సంబంధించిన100 పుస్తకాలు, ఇతర అన్ని అంశాలను డిజిటైజ్ చేసి, ఈ ప్రాజెక్టును కంప్లీట్ చేస్తామన్నారు. గాంధీజీ స్ఫూర్తితో విజయాలు సాధించిన వ్యక్తులు, ఆయనను స్ఫూర్తిగా తీసుకున్న ప్రముఖ వ్యక్తుల సమాచారం కూడా ఇందులో ఉంటుందని చెప్పారు. పోర్టల్ లోని పుస్తకాల నుంచి తరచూ కొన్ని భాగాలను ట్విట్టర్లో పోస్టు కూడా చేస్తామన్నారు.
