హైదరాబాద్, వెలుగు: పదమూడేళ్ల కిందట పెళ్లి చేసుకున్నరు.. వారికి ఇద్దరు పిల్లలు.. చిన్నమ్మాయి బర్త్ డే ఎక్కడ సెలబ్రేట్ చేసుకోవాలనే విషయంలో మాటామాటా అనుకున్నరు. గొడవ పెద్దదైంది. మనస్తాపం చెందిన భార్య.. పాపతోపాటు బిల్డింగ్పై నుంచి దూకేసింది. ఆమె తల పగిలి చనిపోగా, మూడేళ్ల చిన్నారి చిన్నగాయాలతో బయటపడింది. హైదరాబాద్లోని కూకట్పల్లి పోలీస్ స్టేషన్ పరిధిలో జరిగిందీ ఘటన. సిరిసిల్ల జిల్లాకు చెందిన రాముతో పద్మజ(33)కు పెళ్లి జరిగింది. వీరికి ఇద్దరు కూతుళ్లు ఐశ్వర్య(7), అక్షర (3). రాము ఈవెంట్ మేనేజర్ గా పనిచేస్తున్నాడు.
పద్మజ గృహిణి. కూకట్ పల్లి బాలాజీనగర్ లో ఓ అపార్ట్ మెంట్ లో పెంట్ హౌస్‌ కొనుక్కుని ఉంటున్నారు. చిన్న కూతురు అక్షర బర్త్ డే ఎక్కడ ఎలా జరపాలో శనివారం రాత్రి మాట్లాడుకుంటున్నారు. ఈ క్రమంలో మణికొండలో జరుపుదామని పద్మజ.. కాదు ఇంటివద్దే జరుపుదామని రాము పట్టబట్టారు. దీంతో ఇద్దరి మధ్య తీవ్ర గొడవ జరిగింది. మనస్తాపం చెందిన పద్మజ చిన్న కూతురు అక్షరను ఎత్తుకుని రాత్రి 11:45 గంటల సమయంలో నాలుగో అంతస్థు పైనుంచి కిందికి దూకింది. పెద్ద శబ్దం రావడంతో వాచ్ మెన్ వచ్చి చూడగా తలకు గాయమై రక్తపు మడుగులో పద్మజ, పక్కనే చిన్నారి పడి ఉన్నారు. వెంటనే ప్రైవేటు హస్పిటల్కు తరలించగా, అప్పటికే చనిపోయిందని డాక్టర్లు చెప్పారు. అక్షర ప్రాణానికి ఎలాంటి ప్రమాదం లేదన్నారు. చిన్నారిని మెరుగైన చికిత్స కోసం రెయిన్ బో హస్పిటల్ కు తరలించారు. రాముపై తమకు ఎలాంటి అనుమానం లేదని మృతురాలి తండ్రి చెప్పారని పోలీసులు తెలిపారు.
