మహబూబాబాద్ అర్బన్, వెలుగు: మహబూబాబాద్ పట్టణ శివారు అనంతారం రోడ్లోని ప్రభుత్వ భూమిలో వెలసిన గుడిసెలను శనివారం ఉదయం రెవెన్యూ అధికారులు దహనం చేశారు. మహబూబాబాద్ రెవెన్యూ పరిధిలోని 255 సర్వే నంబర్లో సుమారు 50 ఎకరాల్లో ప్రభుత్వ భూమి ఉంది. ఐదు నెలల క్రితం పేదలు అక్కడ గుడిసెలను వేసుకుని ఉంటున్నారు. ఈ భూమిని గత నెలలో ఎమ్మెల్యే శంకర్నాయక్ సందర్శించారు. ప్రభుత్వ ఆఫీసులకు భూములను కేటాయించాలని, వెంటనే ఖాళీ చేయించాలని అధికారులను ఆదేశించారు. శనివారం పోలీస్ సిబ్బందితో అధికారులు అక్కడికి వెళ్లి స్థానికులను అదుపులోకి తీసుకున్నారు. ముందుగా గుడిసెలో ఉన్న సామగ్రి బయటకు తీసుకువచ్చారు. తర్వాత రెవెన్యూ, మున్సిపల్ సిబ్బంది గుడిసెలకు నిప్పు పెట్టి తగలబెట్టారు.
