- రాష్ట్ర అధ్యక్షుడు బల్మూరి వెంకట్
హైదరాబాద్, వెలుగు : ఎన్ఎస్యూఐలో పనిచేస్తున్న ప్రతి ఒక్కరికి తగిన గుర్తింపు ఉంటుందని ఆ సంస్థ రాష్ట్ర అధ్యక్షుడు, ఎమ్మెల్సీ బల్మూరి వెంకట్ అన్నారు. సోమవారం గాంధీభవన్లో ఎన్ఎస్యూఐ రాష్ట్ర కార్యవర్గ సమావేశం జరిగింది. దీనికి బల్మూరి వెంకట్ అధ్యక్షత వహించి మాట్లాడారు. అసెంబ్లీ ఎన్నికల్లో పార్టీ గెలుపు కోసం కష్టపడి పనిచేసిన విధంగానే లోక్సభ ఎన్నికల్లోనూ పని చేసి కాంగ్రెస్ ను గెలిపించుకోవాలని సూచించారు.
తాను ఎమ్మెల్సీ అయ్యానంటే ఎన్ఎస్యూఐకి కాంగ్రెస్ ఇచ్చిన గుర్తింపే కారణమని చెప్పారు. తాను విద్యార్థుల సమస్యలపై పోరాటం చేసినప్పుడు ప్రతి ఎన్ఎస్యూఐ కార్యకర్త తనకు అండగా నిలబడ్డారని తెలిపారు. ఈ సందర్భంగా బల్మూరి వెంకట్ ను పలువురు ఎన్ఎస్ యూఐ నాయకులు అభినందించారు.
