చెట్ల వేర్లు, ఆకులు, కొబ్బరి పీచు, ఎండుగడ్డి, గింజలు, కూరగాయల వేస్ట్తో బొమ్మలు చేస్తున్న ఉమాపతి సొంతూరు పుదుచ్చేరిలోని సెలియమేడు. వాళ్ల నాన్న గవర్నమెంట్ స్కూల్ టీచర్. చేనేత పనిపైన ప్రాణం పెట్టేవాడు ఆయన. రోజూ స్కూల్ నుంచి రాగానే..నేరుగా మగ్గం మీదనే కూర్చునేవాడు. అది చూసి రంగులు, డిజైన్ల మీద తెలియని ఇష్టం మొదలైంది ఉమాపతికి కూడా. దాంతో పదో క్లాస్ పూర్తవగానే బ్యాచిలర్ ఆఫ్ ఫైన్ ఆర్ట్స్లో చేరాడు. శిల్పాల తయారీకి సంబంధించి మాస్టర్స్ కూడా చేశాడు. ఆ వెంటనే 2010 లో గవర్నమెంట్ హై స్కూల్లో ఆర్ట్ టీచర్గా ఉద్యోగం వచ్చింది.
డబ్బు లేకపోవడంతో..
మొదటి రోజు నుంచి.. స్టూడెంట్స్కి ఆర్ట్ని దగ్గర చేయడానికి ప్రయత్నించాడు ఉమాపతి. రకరకాల మెటీరియల్తో బొమ్మలు చేసి చూపించాడు వాళ్లకి. కానీ, తర్వాత ఆలోచిస్తే.. పేద కుటుంబాల నుంచి వచ్చిన స్టూడెంట్స్ అన్ని డబ్బులు పోసి క్రాఫ్టింగ్కి అవసరమయ్యే సామాన్లు కొనలేరని రియలైజ్ అయ్యాడు. అందరికీ అందుబాటులో ఉండే నేచురల్ మెటీరియల్తో బొమ్మలు చేయడం నేర్పించాలనుకున్నాడు. అలానే చేశాడు. అప్పటివరకు తన క్లాస్లకి ఆమడ దూరంగా ఉన్న పిల్లలు కూడా ముందు వరుసలో వచ్చి కూర్చున్నారు. అడిగి మరీ వీకెండ్స్లో స్పెషల్ క్లాసులు పెట్టించుకున్నారు. ఉమాపతి గైడెన్స్తో.. వేస్ట్ మెటీరియల్తోనూ అద్భుతాలు చేయొచ్చని నమ్మారు స్టూడెంట్స్. రకరకాల జంతువులు, పక్షులు, వెహికల్స్, మనుషుల బొమ్మలు, షో పీస్లు తయారు చేయడం మొదలుపెట్టారు.
ఇరవైమంది ఫైన్ ఆర్ట్స్లో చేరారు
సంవత్సరంలోనే వేస్ట్ మెటీరియల్తో మూడొందలకి పైగా ఆర్ట్ పీస్లు తయారుచేశారు పిల్లలు. బ్యాచ్లు మారుతున్నా కొద్దీ వాటి సంఖ్య మరింత పెరగడంతో స్కూల్ గోడలనే ఎగ్జిబిషన్ సెంటర్గా మార్చాడు ఉమాపతి. స్టూడెంట్స్ తయారుచేసిన బొమ్మల్ని వివిధ కాంపిటీషన్స్కి పంపించాడు. అన్నింట్లో మొదటి ప్రైజ్ రావడంతో.. ఉమాపతి టాలెంట్ సోషల్ మీడియాలోనూ వైరల్ అయింది. దాంతో చాలామంది వాటిని చూడటానికి అతను పనిచేస్తున్న స్కూల్కి ‘క్యూ’ కట్టారు. పిల్లలకి, టీచర్స్కి వర్క్షాప్స్ కండక్ట్ చేయమని పిలుపు వచ్చింది అతనికి. బయటి దేశాల్లోనూ స్పెషల్ క్లాసులు తీసుకున్నాడు ఉమాపతి. అన్నింటికీ మించి చాలామంది స్టూడెంట్స్ని ఇన్స్పైర్ చేస్తున్నాడు. తాను పాఠాలు చెప్పిన ఇరవైమంది స్టూడెంట్స్ ఇప్పటికే ఫైన్ ఆర్ట్స్లో బ్యాచిలర్స్ చేస్తున్నారు. అంతేకాదు, చాలామందిని పేదరికం నుంచి బయటకు తీసుకొచ్చాడు. వీలైనంత ఎక్కువమందికి క్రాఫ్టింగ్ నేర్పించాలన్నదే తన కోరిక అంటున్నాడు. ఉమాపతి స్టూడెంట్స్లో చాలామంది బొమ్మల తయారీని ఉపాధిగా చేసుకున్నారు. అలాగే ఎడ్యుకేషన్ డిపార్ట్మెంట్ పర్మిషన్ తీసుకుని.. తమిళనాడులోని చాలా ప్రాంతాల్లో మహిళల కోసం క్రాఫ్టింగ్ వర్క్షాప్స్ కండక్ట్ చేశాడు ఉమాపతి. వాళ్లలో చాలామంది చిన్నపాటి బొమ్మల బిజినెస్లు పెట్టుకున్నారు. అయితే వాళ్లందరికీ నేను కేవలం బొమ్మలు ఎలా చేయాలన్నది మాత్రమే చెప్పా.. మిగతాదంతా వాళ్ల క్రియేటివిటీనే అంటున్నాడు ఈ ఆర్ట్ టీచర్.
