ఆప్ఘనిస్తాన్ లో ఉగ్రవాదులు మరోసారి రెచ్చిపోయారు. ఆదివారం దేశ రాజధాని కాబూల్ లో జరిగిన ఆత్మహుతి దాడిలో దాదాపు 20 మంది మృతి చెందగా, 50 మందికి పైగా గాయపడ్డారు. ఈ ఘటన ఆప్ఘనిస్తాన్ ఉపాధ్యక్ష రేసులో ఉన్న అర్హులా సాలే కార్యాలయం సమీపంలో జరిగినట్లు ప్రభుత్వ అధికారులు తెలిపారు. ఆ ప్రాంతంలో రద్దీగా ఉండే సమయంలో దాడి జరగడం వల్ల మృతుల సంఖ్య ఎక్కువగా ఉన్నట్టు పేర్కొన్నారు.
ఈ దాడిలో సాలే కూడా స్వల్పంగా గాయపడినట్టు వెల్లడించారు. దీంతో అప్రమత్తమైన భద్రత బలగాలు సాలే కార్యాలయంలో చోరబడిన ముగ్గురు ఉగ్రవాదులను మట్టుబెట్టాయి. ఆరు గంటలకుపైగా శ్రమించి 150 మందిని భద్రత బలగాలు రక్షించాయి. కాగా, సెప్టెంబర్ 28 న జరిగే ఎన్నికల కోసం ఆప్ఘనిస్తాన్ అధ్యక్షుడు అష్రాఫ్ ఘనీ, సాలే వర్గం ప్రచారం ప్రారంభించిన కొద్ది గంటల్లోనే ఈ దాడి జరగడం చర్చనీయాంశంగా మారింది. అయితే ఇప్పటివరకు ఈ దాడికి ఏ ఉగ్ర సంస్థ కూడా బాధ్యత వహించలేదు. ఇటీవల కాలంలో దేశవ్యాప్తంగా ఐసిస్, తాలిబన్ ఉగ్రసంస్థల కార్యకలాపాలు పెరిగాయి. ఎన్నికల వేళ ఇలాంటి పరిణామాలు చోటుచేసుకోవడం ఆందోళనకు గురిచేసేలా ఉంది.
