భోపాల్: మధ్యప్రదేశ్ సర్కార్ అమలు చేస్తున్న ‘ముఖ్యమంత్రి కన్య వివాహ్’ పథకంపై మరోసారి వివాదం చెలరేగింది. ఈ స్కీమ్ కింద కొత్త జంటలకు అందజేసిన వెడ్డింగ్ కిట్లో కండోమ్లు, గర్భ నిరోధక ట్యాబ్లెట్లు ఉండడం చర్చనీయాంశమైంది. ఈ పథకం కింద పేదింటి ఆడపిల్లల పెండ్లికి ప్రభుత్వం రూ.55 వేలు అందజేస్తోంది. ఇందులో భాగంగా సోమవారం ఝాబువా జిల్లాలో 296 జంటలకు అధికారులు సామూహిక వివాహాలు జరిపించారు. నవ దంపతులకు వెడ్డింగ్ కిట్లు అందజేశారు. అయితే వాటిలో కండోమ్లు, గర్భ నిరోధక ట్యాబ్లెట్లను చూసి అందరూ అవాక్కయ్యారు. ఫ్యామిలీ ప్లానింగ్పై అవగాహన కల్పించేందుకు ఆరోగ్యశాఖ అధికారులు ఇలా చేసి ఉండొచ్చని జిల్లా అధికారి భూర్సింగ్ రావత్ తెలిపారు. ‘‘ఈ స్కీమ్ కింద రూ.49 వేలు నేరుగా లబ్ధిదారుల అకౌంట్లో వేస్తాం. మిగతా రూ.6 వేలతో పెండ్లి చేస్తాం. వెడ్డింగ్ కిట్లలో కండోమ్స్, ట్యాబ్లెట్లు ఉన్న విషయం మాకు తెల్వదు” అని చెప్పారు. కాగా, పోయిన నెలలో సామూహిక వివాహాల టైమ్లో పెండ్లి కూతుళ్లకు ప్రెగ్నెన్సీ టెస్టు చేయడం వివాదాస్పదమైంది.
