- ఎస్సై అభ్యర్థులను తిప్పి పంపుతున్న వరంగల్ రీజనల్ కంటి ఆస్పత్రి అధికారులు
- ప్రైవేట్ ఆస్పత్రుల్లో కంటి పరీక్షలు
ఎస్సైలుగా ఎంపికైన అభ్యర్థులకు ప్రస్తుతం వైద్య పరీక్షలు చేస్తున్నారు. అందులో భాగంగా కంటి చూపునూ పరీక్షిస్తారు. ఆ టెస్టులను సర్కారు దవాఖానాల్లోనే చేయాల్సి ఉంటుంది. కానీ, వరంగల్ జిల్లాలో దానికి భిన్నంగా ప్రైవేట్ ఆస్పత్రిలో అభ్యర్థులకు టెస్టులు చేయిస్తున్నారు. జిల్లాలోని రీజనల్ కంటి ఆస్పత్రిలో సరైన వసతులు, పరికరాలు లేవన్న కారణం చెప్పి ప్రైవేట్ ఆస్పత్రులకు పంపిస్తున్నారు ఆ హాస్పిటల్ అధికారులు. దీనిపై వైద్య ఆరోగ్య శాఖ మంత్రి ఈటల రాజేందర్కు శనివారం ఫిర్యాదులు అందాయి. మంత్రి పేషీ అధికారులు ఆ ఆస్పత్రి సూపరింటెండెంట్కు ఫోన్ చేసి ఆగ్రహం వ్యక్తం చేశారు. వైద్య విద్య డైరెక్టర్ డాక్టర్ రమేశ్ రెడ్డి కూడా ఆరా తీశారు. వసతులు లేకపోతే అధికారులకు చెప్పాలి గానీ సొంత నిర్ణయాలు తీసుకోవద్దని మందలించినట్టు తెలుస్తోంది. ప్రైవేట్ ఆస్పత్రిలో పరీక్షలు చేయించిన అభ్యర్థులందరినీ హైదరాబాద్ సరోజినీ దేవి కంటి ఆస్పత్రికి పంపించాల్సిందిగా రమేశ్ రెడ్డి ఆదేశించారని సమాచారం.
