- సాగైన పంటలనూ నమోదు చేయడంలో ఏఈవోల నిర్లక్ష్యం
- ఎరువుల సప్లై, ధాన్యం, పత్తి సేకరణలో అంచనాలు తారుమారు
- పంట ఉత్పత్తులు అమ్ముకునేందుకు అన్నదాతలకు తిప్పలు
- ఈసారైనా క్రాప్ బుకింగ్కచ్చితంగా జరిగేనా...?
మంచిర్యాల, వెలుగు: రాష్ట్రంలో పంటల నమోదు(క్రాప్ బుకింగ్) ప్రక్రియ తప్పుల తడకగా సాగుతోందన్న విమర్శలు వస్తున్నాయి. ప్రతి ఏటా వానాకాలం, యాసంగి సీజన్లలో వ్యవసాయ శాఖ ఏఈవోల ద్వారా క్రాప్ బుకింగ్ నిర్వహిస్తుంది. ఈ డేటా ఆధారంగానే ప్రభుత్వం ఆయా సీజన్లలో విత్తనాలు, ఎరువులు సిద్ధం చేయడంతో పాటు ధాన్యం కొనుగోళ్లకు సంబంధించిన ఏర్పాట్లు చేపడుతుంది. రైతులు వేసిన పంటలకు అవసరమైన ఎరువులు సమకూర్చుకోవాలన్నా, బ్యాంకుల్లో క్రాప్లోన్లు పొందాలన్నా, పండించిన పంటను అమ్ముకోవాలన్నా ఈ డేటానే కీలకంగా మారుతుంది. కానీ కొంతమంది ఏఈవోలు తూతూమంత్రంగా క్రాప్బుకింగ్ నమోదు చేసి చేతులు దులుపుకుంటున్నారు. ఫీల్డ్కు వెళ్లి రైతులు ఏ పంట వేశారో చూడకుండా ఆఫీసుల్లో కూర్చుని కాకిలెక్కలు సమర్పిస్తున్నారు. రైతులు ఒక పంట వేస్తే ఏఈవోలు మరో పంటను నమోదు చేస్తున్నారు. మరోవైపు కేంద్ర ప్రభుత్వం తీసుకొచ్చిన డిజిటల్ క్రాప్సర్వే(డీసీఎస్) కూడా లోపభూయిష్టంగా సాగుతోంది. దీంతో పండించిన పంటను అమ్ముకునేందుకు రైతులు నానాపాట్లు పడుతున్నారు. వ్యవసాయ అధికారుల నిర్లక్ష్యం అన్నదాతలను అగచాట్లు పెడుతోంది. మళ్లీ వానాకాలం సీజన్ ప్రారంభమైన నేపథ్యంలో ఈసారైనా కచ్చితమైన సమాచారంతో క్రాప్ బుకింగ్చేపట్టాలని రైతులు కోరుతున్నారు. గతంలో జరిగిన పొరపాట్లు పునరావృతం కాకుండా ఉన్నతాధికారులు చర్యలు తీసుకోవాల్సిన అవసరముంది.
ఇదీ పరిస్థితి...
మంచిర్యాల జిల్లా వేమనపల్లి మండలం కొత్తపల్లిలో 763 ఎకరాలు, దస్నాపూర్లో 2,435 ఎకరాల రెవెన్యూ భూమి ఉంది. రైతులు గత యాసంగి సీజన్లో దాదాపు 540 ఎకరాల్లో వరి పంట సాగు చేశారు. ప్రభుత్వం రెండు గ్రామాల్లో ధాన్యం కొనుగోలు సెంటర్లను ఏర్పాటు చేసింది. కానీ ఈ రెండు గ్రామాల్లో పంటలు సాగు చేసినట్టు క్రాప్ బుకింగ్లో నమోదు కాలేదు. దీంతో రైతులు పండించిన ధాన్యాన్ని అమ్ముకునేందుకు తీవ్ర ఇబ్బందులు ఎదుర్కొన్నారు. దాదాపు ఇరవై రోజుల పాటు ధాన్యం కుప్పల వద్ద పడిగాపులు కాశారు. చివరకు కౌలు రైతుల పేరిట టెంపరరీ రిజిస్ట్రేషన్ చేయించుకొని ధాన్యం అమ్ముకున్నారు. అలాగే కోటపల్లి మండలం ఆలుగామకు చెందిన ఓ రైతు తనకున్న ఎకరంన్నర పొలంలో ఏటా వరి పంట సాగు చేస్తున్నాడు. కానీ ఆ రైతు పేరిట పత్తి పంట వేసినట్టుగా క్రాప్ బుకింగ్లో నమోదు చేశారు. ధాన్యం అమ్ముకునే క్రమంలో క్రాప్ బుకింగ్ డేటా చూస్తే వరి కాకుండా కాటన్ వేసినట్టుగా చూపింది. దీంతో ఇతరుల పేరిట వడ్లు అమ్ముకోగా, పేమెంట్ కోసం ఇబ్బందులు పడ్డట్టు సమాచారం. ఇలా క్రాప్ బుకింగ్ డేటాలో తప్పుల కారణంగా రాష్ట్రంలో అనేక మంది రైతులు అవస్థలు పడుతున్నారు.
డీసీఎస్లోనూ లోపాలు
కేంద్ర ప్రభుత్వం శాస్ర్తీయ పద్ధతిలో జియో ట్యాగింగ్ ద్వారా చేపడుతున్న డిజిటల్ క్రాప్సర్వే(డీసీఎస్) సైతం నామమాత్రంగా సాగుతోంది. మొదట్లో ఏఈవోల ద్వారా డీసీఎస్ చేపట్టగా తమకు పనిభారం పెరుగుతోందంటూ ఆందోళనబాట పట్టారు. దీంతో ఈ పనిని గ్రామాల్లోని వాలంటీర్లకు అప్పజెప్పారు. వారు క్షేత్రస్థాయిలో పొలాలకు వెళ్లి రైతులు ఏ పంట వేశారో నమోదు చేస్తూ జియో ట్యాగింగ్ చేయాల్సి ఉంటుంది. వారికి ఒక్కో రిజిస్ట్రేషన్కు రూ.7 చొప్పున చెల్లిస్తున్నారు. కానీ అగ్రికల్చర్ అధికారులు చేతులు దులిపేసుకోవడంతో ఈ ప్రక్రియ కూడా సరిగా సాగడం లేదు. ఫలితంగా కేంద్ర, రాష్ట్ర ప్రభుత్వాలకు స్పష్టమైన సమాచారం అందకపోవంతో వ్యవసాయ ప్రణాళిక గాడితప్పుతోంది. రైతులు పంటలు వేసినప్పుడే కచ్చితమైన విస్తీర్ణం, సాగు వివరాలు నమోదు చేస్తే ఏ పంటకు ఎంత ఎరువు అవసరమవుతుంది? వరి, పత్తి కొనుగోలు సెంటర్లు ఎన్ని ఏర్పాటు చేయాలి? అనే అంచనాలకు అవకాశం ఉంటుంది. పంట విక్రయంలో రైతులకు అవస్థలు తప్పుతాయి.
