న్యూఢిల్లీ: శత్రుదేశాల సైన్యాలకు వణుకు పుట్టించేలా హిందూస్థాన్ ఏరోనాటిక్స్ లిమిటెడ్ (హెచ్ఏఎల్) రూపొందించిన తేలికపాటి యుద్ధ హెలికాప్టర్లు(ఎల్సీహెచ్ లు) సోమవారం ఎయిర్ ఫోర్స్ అమ్ములపొదికి చేరనున్నాయి. రాజస్థాన్ జోధ్ పూర్ లోని ఎయిర్ ఫోర్స్ బేస్ లో జరిగే కార్యక్రమంలో రక్షణ మంత్రి రాజ్ నాథ్, ఎయిర్ చీఫ్ మార్షల్ వీఆర్ చౌధరి సమక్షంలో వీటిని వాయుసేనలోకి ప్రవేశపెట్టనున్నారు.
ఈ హెలికాప్టర్లతో ఎయిర్ ఫోర్స్ పోరాట పటిమ గణనీయంగా పెరుగుతుందని రాజ్ నాథ్ సింగ్ ఆదివారం ట్వీట్ చేశారు. ఎయిర్ ఫోర్స్ కోసం 10, ఆర్మీ కోసం 5 ఎల్ సీహెచ్ లను సమకూర్చుకునేందుకు ప్రధాని మోడీ ఆధ్వర్యంలోని కేబినెట్ కమిటీ గత మార్చిలో ఆమోదం తెలిపింది. ఇందుకు రూ. 3,887 కోట్లను కేటాయించింది. ఇటీవలే ఈ హెలికాప్టర్లు ఆర్మీలో చేరగా, ఇప్పుడు ఎయిర్ ఫోర్స్ చేతికీ అందనున్నాయి.
నిలువుగా కూలినా తట్టుకుంటది..
సముద్రంలో, నేలపై, అడవుల్లో, హిమాలయాల వంటి ఎత్తైన ప్రాంతాల్లో, ఎలాంటి వాతావరణ పరిస్థితుల్లోనైనా సమర్థంగా ఎగిరేలా తయారు చేసిన ఎల్ సీహెచ్లు.. అటు పాక్, ఇటు చైనా సైన్యానికి వణుకు పుట్టించడం ఖాయమని ఎక్స్పర్ట్లు చెప్తున్నారు. కేవలం 5.8 టన్నుల బరువుఉండే ఎల్ సీహెచ్లలో 24 చిన్న మిసైళ్లు, ఇతర వెపన్స్ ఉంటాయి. శత్రు రాడార్లు, మిసైళ్లు, జెట్లకు చిక్కకుండా తప్పించుకుంటూ వాటిపై దాడి చేసే సత్తా వీటి సొంతం. దీని ముందువైపు ఉన్న గన్ 110 డిగ్రీల కోణంలో తిరిగి బులెట్లు పేల్చగలదు. దీనిని పూర్తిగా ఆర్మర్డ్ వెహికల్గా రూపొందించడంతో శత్రువులు ఫైరింగ్ చేసినా పెద్దగా డ్యామేజ్ కాదు. ఒకవేళ కూలిపోయినా తట్టుకునేలా ల్యాండింగ్ గేర్ అమర్చారు.
