- ఏప్రిల్ తర్వాత ఎప్పుడైనా చేపట్టేలారాష్ట్రాలకు చాన్సిచ్చిన కేంద్రం
- మన దగ్గర ఎండాకాలం సెలవుల్లో ‘ఇండ్ల లెక్కింపు’ చేసే యోచన
- 2021 ఫిబ్రవరిలో జనాభా లెక్కలు
- అవసరమైన సిబ్బంది, ఇతర ఏర్పాట్లలో అధికారులు
ఎన్పీఆర్ ప్రక్రియ తొలిదశలో ‘ఇండ్ల లెక్కింపు’ను ఏప్రిల్ నుంచి సెప్టెంబర్ మధ్య ఎప్పుడైనా చేపట్టేలా రాష్ట్రాలకు కేంద్రం అవకాశమిచ్చింది. ఈ ప్రోగ్రాంలో సమాచారం సేకరించే ఎన్యుమరేటర్లంతా టీచర్లే కావడంతో.. ఎండాకాలం సెలవుల్లో నిర్వహించాలని రాష్ట్ర సర్కారు భావిస్తోంది. వచ్చే ఏడాది ఫిబ్రవరిలో జనాభా లెక్కలు చేపట్టనున్నారు.
న్యూఢిల్లీ, వెలుగు: నేషనల్ పాపులేషన్ రిజిస్టర్ (ఎన్పీఆర్) ప్రక్రియలో భాగంగా రాష్ట్రంలో మే నుంచి ‘నివాసాల లెక్కింపు’ మొదలుకానుంది. ఈ ప్రోగ్రాంలో ఎన్యుమరేటర్లుగా టీచర్లే ఉండే నేపథ్యంలో ఎండా కాలం సెలవుల్లో చేపట్టాలని భావిస్తున్నట్టు తెలిసింది. దేశవ్యాప్తంగా ఏప్రిల్ నుంచే ఎన్పీఆర్ తొలిదశను ప్రారంభించనున్నారు. అయితే రాష్ట్రాలు ఏప్రిల్ నుంచి సెప్టెంబర్ మధ్య ఎప్పుడైనా 45 రోజుల టైం పీరియడ్లో తొలిదశను పూర్తి చేసేందుకు కేంద్ర సర్కారు వీలు కల్పించింది. ఆ సమాచారం ఆధారంగా వచ్చే ఏడాది ఫిబ్రవరిలో జన గణన చేపట్టనుంది. దీనికి సంబంధించి శుక్రవారం ఢిల్లీలో కేంద్ర హోం శాఖ సహాయ మంత్రి నిత్యానంద్రాయ్ అధ్యక్షతన అన్ని రాష్ట్రాలు, కేంద్ర పాలిత ప్రాంతాల సీఎస్లు, సెన్సస్ అధికారులతో సమావేశం నిర్వహించారు. అందులో తెలంగాణ నుంచి సెన్సస్ డైరెక్టర్ ఇలంబర్తి, జీఏడీ కార్యదర్శి కిషన్, తెలంగాణ భవన్ రెసిడెంట్ కమిషనర్ గౌరవ్ ఉప్పల్ పాల్గొన్నారు. ఈ సందర్భంగా కేంద్ర మంత్రి నిత్యానంద్రాయ్ 2021 సెన్సస్ అధికారిక మస్కట్ను ప్రారంభించి మాట్లాడారు. సెన్సస్ నిర్వహించాల్సిన అవసరాన్ని, అమల్లో రాష్ట్రాల పాత్రను వివరించారు. రిజిస్ట్రార్ జనరల్, సెన్సస్ కమిషనర్ డాక్టర్ వివేక్ ఈ అంశంపై పవర్ పాయింట్ ప్రజెంటేషన్ ఇచ్చారు.
స్కూళ్ల సెలవుల టైంలో..
రాష్ట్రంలో మే నుంచి తొలిదశ ఎన్పీఆర్ ప్రారంభమయ్యే అవకాశముంది. మొదటి దశలో రాష్ట్రవ్యాప్తంగా ఉన్న ఇండ్లు (నివాసాలు) లెక్కిస్తారు. డివిజన్, మండలం, గ్రామ స్థాయిలో నివాసాల వివరాలను నమోదు చేస్తారు. ఎంపీడీవోలు, తహసీల్దార్లు, టీచర్లు ఈ ప్రక్రియలో పాల్గొంటారు. ముఖ్యంగా క్షేత్రస్థాయిలో వివరాలు సేకరించే ఎన్యుమరేటర్స్ గా టీచర్లే ఉంటారని, అందువల్ల ఎండాకాలం సెలవుల సమయంలో ఈ ప్రక్రియ చేపట్టవచ్చని రాష్ట్రానికి చెందిన ఒక కీలక అధికారి చెప్పారు. అంటే మేలో మొదలయ్యే చాన్సుందని తెలిపారు. రాష్ట్రంలో గత పదేండ్లలో కొత్తగా వందలాది కాలనీలు వెలిశాయని, మల్టీ స్టోరేజీ భవనాల నిర్మాణం పెరిగిందని చెప్పారు. ఈ వివరాలన్నీ సేకరించాల్సి ఉంటుందన్నారు. ఈ సమాచారం ఆధారంగా 2021లో సెన్సస్ చేపడతారని.. అప్పుడు కూడా టీచర్లు ఎన్యుమరేటర్లుగా, డివిజన్ ఇన్చార్జులుగా పైఅధికారులు ఉంటారని వివరించారు.
