లోన్ యాప్ ఎంత పనిచేసింది.. వేధింపులతో యువకుడి ఆత్మహత్య

• భార్య ఫొటో మార్ఫింగ్ చేసి ఫ్రెండ్స్​కు పంపిన్రు
• డబ్బులు కట్టినా వదిలిపెట్టలేదు
• ఏమీ చేయలేక ఉరేసుకున్న వినోద్

​జీడిమెట్ల, వెలుగు:పేట్ బషీరాబాద్ పోలీస్ స్టేషన్ పరిధిలో లోన్​యాప్​ వేధింపులు భరించలేక ఓ వ్యక్తి ఆత్మహత్య చేసుకున్నాడు. వరంగల్ జిల్లా నల్లబెల్లి మండ లం నందిగామకు చెందిన మరిగిద్దె వినోద్​కుమార్​(35) కొన్నేండ్ల కింద సిటీకి వచ్చి బోయిన్​పల్లిలో ప్రైవేట్​ జాబ్​ చేస్తున్నాడు. 

భార్య మంజూషదేవి, బాబు అఖిరానందన్ (4), పాప నందన(3)తో కలిసి చింతల్ శ్రీరామనగర్ లో ఉంటున్నాడు. ఇటీవల వినోద్ తండ్రి శంకర్​రావు అనారోగ్యంతో ఉండడంతో దవాఖాన ఖర్చుల కోసం రూ.4 లక్షల వరకు అప్పు చేశారు. దీనికి తోడు వినోద్ కు మూడు నెలల నుంచి జీతం సక్రమంగా రావడం లేదు. కొద్ది నెలల కింద భార్యకు తెలియకుండానే ఆమె ఫోన్​ నుంచి ఓ లోన్​యాప్​లో రుణం తీసుకున్నాడు. 

ఆ టైంలో భార్య ఫొటోను యాప్​లో అప్​లోడ్​ చేసి తర్వాత యాప్​ డిలీట్ చేశాడు. నెల నెలా వాయిదాలు కడుతూ వస్తున్నాడు. ఇటీవల కొన్ని వాయిదాలు చెల్లించలేదు. ఈ నెల 8న అతడి పెండ్లి రోజు కావడం, వినాయక చవితి ఉండడంతో యూసుఫ్​గూడలోని సోదరుడి ఇంటికి భార్య, ఇద్దరు పిల్లలను పంపించాడు. 

Also Read : బోర్లను మింగిన వాగులు

లోన్​యాప్​ నుంచి కాల్స్​ రాగా ఆన్సర్​ చేయలేదు. దీంతో లోన్​యాప్​ నిర్వాహకులు కుటుంబసభ్యులకు కాల్​చేసి రూ.2300 కట్టాలని చెప్పారు. అంతటితో ఆగకుండా అతడి భార్య ఫొటోను మార్ఫింగ్​ చేసి అతడి ఫ్రెండ్స్, కుటుంబసభ్యులకు పంపారు. దీంతో అతడి బావమరిది లోన్​యాప్​ అమౌంట్​చెల్లించాడు. 

అయినా, మొత్తం డబ్బులను కట్టాలని మరోసారి కాల్స్​చేసి వేధిస్తుండడంతో కలత చెందాడు. సోమవారం ఇంట్లో ఫ్యాన్​కు ఉరివేసుకొని ఆత్మహత్య చేసుకున్నాడు. పేట్ బషీరాబాద్ పోలీసులు కేసు నమోదు చేసి దర్యాప్తు చేస్తున్నారు.