సిటీల్లో కాలుష్యం ఏ రేంజ్లో ఉందో మనం చూస్తూనే ఉన్నాం. దీంతో ముక్కుమూసుకుని బయటికెళ్లాల్సిన పరిస్థితి. ఎన్ని జాగ్రత్తలు తీసుకున్నా ఎంతో కొంత పొగను మనం పీల్చేస్తూనే ఉన్నాం. మరి, ఆ కాలుష్యపు పొగను మనం పీల్చకుండా కర్టెన్లు పీల్చేసి ఆక్సిజన్ను తయారు చేసిస్తే ఎట్ల ఉంటదన్న ఆలోచన వచ్చింది లండన్కు చెందిన కొందరు సైంటిస్టులు, ఆర్కిటెక్ట్లకు. కాలుష్యం లేకుండా సిటీలను పచ్చగా మార్చేయాలన్న ఆ ఆలోచనతోనే ఆల్గే బయో కర్టెన్లను తయారు చేశారు. ఆల్గే అంటే, అందరికీ తెలసిందే. నీళ్లలో ఉండే పాకూరు. అదేనండి నాచు. సింపుల్గా చెప్పాలంటే నాచు కర్టెన్లను తయారు చేశారు. ఏ బిల్డింగులకైనా, ఇళ్లకైనా పెట్టేసుకోవచ్చు.
ఆల్గేనే ఎందుకంటే…
మనకంటే కార్బన్ డయాక్సైడ్ డేంజర్. కానీ, నాచుకు అదే ఆహారం మరి. దానిని పీల్చేసుకుని నాచు ఎదుగుతుంది. స్వచ్ఛమైన ఆక్సిజన్ను విడుదల చేస్తుంది. అందుకే సైంటిస్టులు నాచును ఎంచుకున్నారు. సహజసిద్ధంగానే దానిని నీటి వనరులు లేదా ఇళ్ల నుంచి సేకరించి ల్యాబ్లో ట్రీట్ చేస్తారు. దాని పనితీరు మరింత పెరిగేలా ఓ రకం జెల్ను దానికి కలుపుతారు. ఇప్పుడు ఆ నాచు జెల్ను ప్లాస్టిక్ కర్టెన్లలోకి ఎక్కిస్తారు. అలా నాచును నింపిన కర్టెన్లను బిల్డింగ్లకు వేలాడదీస్తారు. అప్పుడు ఆ కర్టెన్లపై సూర్యుడి కాంతి పడడం వల్ల ఆ కర్టెన్లలోని నాచు కిరణ జన్య సంయోగ క్రియ (ఫొటోసింథసిస్)ను జరుపుతుంది. కర్టెన్ల కింది భాగం నుంచి కాలుష్య కారక పొగను నాచు పీలుస్తుంది. ఫొటోసింథసిస్ ద్వారా కార్బన్ డయాక్సైడ్ను తీసుకుని, కర్టెన్ల పై భాగం నుంచి ఆక్సిజన్ను గాల్లోకి వదిలేస్తుంది. నగరాల్లో కాలుష్య కారకాలను తగ్గించేందుకు ఇది చాలా మంచి ప్రత్యామ్నాయమని ఈ కర్టెయిన్లను తయారు చేసిన ఎకోలాజిక్స్టూడియో సైంటిస్ట్ డాక్టర్ మార్కో పొలెట్టో చెప్పారు. ఈ కర్టెన్లు ఓ పెద్ద చెట్టుతో సమానమన్నారు. 2050 నాటికి కాలుష్యం లేని నగరాలుగా తీర్చిదిద్దేందుకు బ్రిటన్ పెట్టుకున్న లక్ష్యాన్ని అందుకోవాలంటే ఇలాంటి మార్గాల్లో వెళితే బాగుంటుందని సూచించారు. ప్రస్తుతం వీటిని డబ్లిన్లోని కస్టమ్స్ అండ్ రెవెన్యూ హౌస్ బిల్డింగ్కు, హెల్సింకీలోని హౌస్ ఆఫ్ నోబిలిటికి ఏర్పాటు చేశారు.
లోపాలూ ఉన్నాయి
చెట్లతో పోలిస్తే ఈ బయో కర్టెన్లలో కొన్ని లోపాలూ ఉన్నాయి. కర్టెన్లు కేవలం 70 శాతం మాత్రమే నేలలో కలిసిపోతాయి. మిగతాదంతా ప్లాస్టికే. అంతేకాదు, దీంట్లో వాడుతున్న నాచును తరచూ పెంచాల్సి ఉంటుంది. దానికి పటిష్టమైన నిర్వహణ అవసరం. దానికి చాలా ఖర్చు అవుతుంది. ఈ కర్టెన్లకు స్థలం అవసరం కొంచెమే ఉన్నా, వాటికి పెద్ద మొత్తంలో డబ్బు ఖర్చు చేయాల్సి ఉంటుంది. ఖర్చు మాటెలా ఉన్నా ప్రకృతితో మనకున్న సంబంధాన్ని పూర్తిగా మార్చేయడం కోసమే ఈ ప్రయత్నమంటున్నారు ఎకోలాజిక్స్టూడియోకే చెందిన మరో సైంటిస్ట్ క్లాడియా పాస్క్వెరో. మనిషి కార్బన్ డయాక్సైడ్ పీల్చుకుంటే ప్రమాదమని, అదే కార్బన్ డయాక్సైడ్ నాచుకు ఆహారమని అన్నారు. కాబట్టి కాలుష్యం ఉండే సిటీల్లో ఈ నాచును వాడితే, వాటికి ఆహారంతో పాటు మనకు స్వచ్ఛమైన ఆక్సిజన్ దొరుకుతుందని చెబుతున్నారు.