భువనగిరి, వెలుగు: కన్న కొడుకులు కాదన్నారని ఓ వ్యక్తి ఆత్మహత్య చేసుకున్న ఘటన శనివారం యాదాద్రి భువనగిరి జిల్లా కలెక్టర్ కార్యాలయం వెనుకభాగంలో చోటుచేసుకుంది. వలిగొండ మండలం పులిగిల్ల గ్రామానికి చెందిన వరకంత ఎల్లారెడ్డి(60)కి 30 ఎకరాల వ్యవసాయ భూమి ఉంది. ఇద్దరు కొడుకులు, ఓ కూతురు ఉన్నారు. కొడుకులు మోసపూరితంగా భూమిని పట్టా చేసుకుని తనను పట్టించుకోకుండా వేధిస్తున్నారని, న్యాయం చేయాలని గతంలో ఆర్డీవోకు ఫిర్యాదు చేశారు. శనివారం కలెక్టరేట్ లోని బి బ్లాకు ట్రెజరీ ఆఫీస్ వద్ద గల వేప చెట్టుకు ఎల్లారెడ్డి ఉరి వేసుకొని చనిపోయాడు. గమనించిన ప్రాంగణం నిర్వాహకులు పోలీసులకు సమాచారం అందించారు. భువనగిరి రూరల్ సీఐ సురేందర్ రెడ్డి కేసు నమోదు చేసుకొని దర్యాప్తు చేస్తున్నారు.
