న్యూఢిల్లీ: ప్రతిపక్షం ఉంటేనే ప్రజాస్వామ్యం గొప్పగా వర్ధిల్లుతుందన్న ప్రధాని నరేంద్ర మోడీ, నంబర్ తగ్గినందుకు బాధపడొద్దని ప్రతిపక్షాలకు సూచించారు. సీట్ల సంఖ్య కంటే సూచనలకే ప్రాధాన్యం ఇస్తామని, ప్రతిపక్ష నేతల ప్రతిమాటను, ప్రతి సూచనను అమూల్యమైందిగా భావిస్తామన్నారు. స్వపక్షం, ప్రతిపక్షం అనే తేడాలు పక్కనపెట్టి నిష్పక్షపాతంగా పనిచేద్దామని పిలుపిచ్చారు. లోక్సభ ప్రారంభం కావడానికి ముందు పార్లమెంట్ ఆవరణలో ఆయన మీడియాతో మాట్లారు. ‘‘ఎక్కువ మంది కొత్త ఎంపీల రాకతో లోక్సభకు సరికొత్త ఉత్సాహమొచ్చింది. వాళ్లు తమతో మోసుకొచ్చిన కొత్త కలలు సాకారం కావాలంటే సభ సజావుగా సాగాలి. స్వాతంత్ర్యం తరువాత ఎక్కువ శాతం ఓటింగ్, ఎక్కువ మంది మహిళలు ఎంపీలుగా ఎన్నిక కావడం 2019 ఎన్నికల్లోనే జరిగింది.
దశాబ్దాల గ్యాప్ తర్వాత సుస్థిర ప్రభుత్వాన్ని ప్రజలు రెండోసారీ గెలిపించారు. సభ సజావుగా సాగితేనే ప్రజలకు అవసరమైన నిర్ణయాలు తీసుకోగలం. చక్కటి చర్చకు అన్ని పార్టీల సభ్యులూ సహకరిస్తారని ఆశిస్తున్నా. ‘సబ్కా సాత్, సబ్ కా వికాస్’ నినాదంతో బయలుదేరిన మమ్మల్ని ప్రజలు ఆశీర్వదించారు. సామాన్యూడి కలల్ని నిజం చేయాలన్న సంకల్పంతోనే ఎంపీలందరం పనిచేయాలి. వచ్చే ఐదేండ్లలో చట్టసభల ఉన్నతిని ఇంకా పెంచడానికి ప్రయత్నిస్తాం. ఫస్ట్ సెషన్ నుంచే రెట్టించిన వేగంతో పనిచేస్తాం”అని మోడీ చెప్పారు.
మీడియాపై సెటైర్లు
ప్రజాస్వామ్యాన్ని బలోపేతం చేసే పనిని మీడియా సమర్థవంతంగా నిర్వహించడంలేదని ప్రధాని మోడీ ఆక్షేపించారు. ప్రజాసమస్యలపై అనర్గళంగా, అద్బుతంగా మాట్లాడగలిగే ఎంపీలు ఎంతో మంది ఉన్నా, టీఆర్పీ రేటింగ్స్ రావన్న ఒకే ఒక్క కారణంతో వాళ్లను టీవీల్లో చూపించడంలేదని సెటైర్లు వేశారు. ‘‘ప్రభుత్వానికి వ్యతిరేకంగా ఒక ఎంపీ లాజికల్గా మాట్లాడుతున్నా, అలాంటి చర్చలు టీవీల్లో చూపించినా ప్రజాస్వామ్యం మరింత బలపడుతుంది. కానీ టీఆర్పీ రేటింగ్ రాదు కాబట్టి మీరు(టీవీ చానెళ్లు) అలా చేయరు. రేటింగ్స్ను దాటి మీడియా కాస్త ముందుకెళ్లాలని ఆకాక్షిస్తున్నాను. వచ్చే ఐదేండ్లలో మంచి చర్చలకు మీడియా పెద్దపీట వేయాలని కోరుకుంటున్నాను”అని మోడీ ముగించారు.
