- వెతుకుతున్న పోలీసులు
- ఏ క్షణంలోనైనా కస్టడీలోకి.. ముందస్తు బెయిల్కు ప్రయత్నాలు
భద్రాద్రి కొత్తగూడెం, వెలుగు : కొత్తగూడెం జిల్లాలో రామకృష్ణ, అతడి కుటుంబం ఆత్మహత్య కేసులో నిందితుడైన ఎమ్మెల్యే వనమా వెంకటేశ్వరరావు కొడుకు, టీఆర్ఎస్ లీడర్ వనమా రాఘవ పాల్వంచలోని తన ఇంటి నుంచి పరారైనట్టు తెలుస్తోంది. ఇప్పటికే రామకృష్ణ సూసైడ్ నోట్, సెల్ఫోన్ను పోలీసులు స్వాధీనం చేసుకున్నారు. ఎవిడెన్స్ను పరిశీలిస్తున్నామని, రాఘవ కోసం గాలిస్తున్నట్టు ఏఎస్పీ రోహిత్ రాజు తెలిపారు. తన కోసం వెతుకుతున్నారని తెలుసుకున్న రాఘవ అజ్ఞాతంలోకి వెళ్లి ముందస్తు బెయిల్ కోసం ప్రయత్నాలు చేస్తున్నాడనే ప్రచారం సాగుతోంది. రాఘవ తండ్రి, ఎమ్మెల్యే వనమా వెంకటేశ్వర రావు కూడా కొడుకు అరెస్టు కాకుండా పై స్థాయిలో పైరవీ చేస్తున్నారని సమాచారం.
హైకమాండ్ ఆరా..
రాఘవ కేసు విషయమై టీఆర్ఎస్ హైకమాండ్ ఆరా తీస్తున్నట్టు తెలిసింది. రామకృష్ణ కుటుంబం ఆత్మహత్యలో రాఘవ ప్రమేయంపై సమాచారం సేకరిస్తున్నారని తెలుస్తోంది. మరోవైపు ఇంటెలిజెన్స్ వర్గాలు కూడా గతంలో వనమా రాఘవపై ఉన్న కేసులు, సెటిల్మెంట్స్, దందాల గురించి తెలుసుకుంటున్నారని టాక్ వినిపిస్తోంది.
ట్రీట్మెంట్తీసుకుంటూ సాహితి మృతి
దవాఖానాలో ట్రీట్మెంట్ తీసుకుంటున్న రామకృష్ణ బిడ్డ సాహితి మంగళవారం చనిపోయింది. సోమవారం కొన ఊపిరితో ఉన్న సాహితిని కొత్తగూడెం జిల్లా గవర్నమెంట్హాస్పిటల్కు తరలించారు. చిన్నారి ప్రాణాన్ని కాపాడేందుకు డాక్టర్లు చివరి వరకు ప్రయత్నించినా ఫలితం లేకుండా పోయింది.
