మరికొద్ది రోజుల్లో రాఫెల్ యుద్ధ విమానాలు ఆర్మీలోకి చేరబోతున్నాయి. మన సైనిక బలగం బలాన్ని మరింత పెంచబోతున్నాయి. మరి, అలాంటి రాఫెల్కు ఎంత దూరంలో ఉన్నా వెంటాడి వేటాడే మిసైళ్లు తోడైతే ఆ బలం ఇంకెంత ఉంటుంది? అవును, అలాంటి డెడ్లీ మిసైళ్లే రాఫెల్లో సీట్లు బుక్ చేసుకున్నాయి. ఆ మిసైళ్లు మీటియోర్, స్కాల్ప్. యూరప్కు చెందిన ఎంబీడీఏ (మాత్రా బీఏఈ డైనమిక్స్ ఎలీనియా) అనే కంపెనీ వాటిని తయారు చేసింది. 59 వేల కోట్ల రూపాయల రాఫెల్ డీల్లో అవి కూడా భాగం. వాటి వల్ల ఇప్పటికే రగిలిపోతున్న బార్డర్లో ఇండియాకు మరింత శక్తి వచ్చినట్టవుతుంది. మంగళవారం పారిస్లోని ఎయిర్బేస్లో రాఫెల్ జెట్లను అధికారికంగా కేంద్ర రక్షణ శాఖ మంత్రి రాజ్నాథ్ సింగ్ తీసుకోనున్నారు. ‘‘ఇంతకుముందు ఎన్నడూ లేనంతగా ఈ వెపన్లతో కూడిన రాఫెల్ యుద్ధవిమానాలతో ఇండియా ఆర్మీ శక్తిమంతమవుతుంది. ఇండియన్ ఎయిర్ఫోర్స్ (ఐఏఎఫ్)కు ఈ స్కాల్ప్, మీటియోర్ మిసైళ్లు అదనపు బలాన్నిస్తాయి” అని ఎంబీడీఏ ఇండియా చీఫ్ లోయిక్ పీడివాచె అన్నారు. అత్యంత అధునాతనమైన ఈ వెపన్లున్న రాఫెల్ చాలా డెడ్లీ యుద్ధవిమానమన్నారు. ఇండియాకు 36 రాఫెల్ విమానాలు అమ్మే ప్రాజెక్టులో భాగస్వాములమైనందుకు సంతోషంగా ఉందన్నారు. ప్రపంచంలోని కంటికి కనిపించని దూరాలను ఛేదించే మిసైళ్లలో మీటియోర్ బెస్ట్ అని చెప్పారు.
మీటియోర్.. తప్పించుకోవడం కష్టం
ఇది బియాండ్ విజువల్ రేంజ్ ఎయిర్ టు ఎయిర్ మిసైల్. అంటే కంటికి కనిపించని దూరాల్లోని లక్ష్యాలను ఈజీగా కొట్టేసే మిసైల్ అన్నమాట. 150 కిలోమీటర్ల దూరంలో ఉన్న లక్ష్యాలనూ ఛేదించగలదు. ఒకవేళ లక్ష్యం 60 కిలోమీటర్ల దూరంలో గనక ఉంటే మీటియోర్ నుంచి తప్పించుకోవడం అసాధ్యం. దాంట్లోని ఘన ఇంధన ర్యామ్జెట్ ఇంజన్లతో అది మాక్ 4 స్పీడ్తో దూసుకెళుతుంది. అంటే సౌండు స్పీడు కన్నా నాలుగు రెట్ల వేగమన్నమాట. ఇంకా చెప్పాలంటే.. గంటకు దాదాపు 5 వేల కిలోమీటర్ల వేగంతో వెళుతుంది. అంతేకాదు, ఒక్కసారి విమానం నుంచి దాన్ని వదిలాక అది టార్గెట్ తప్పితే, మళ్లీ దానిని రీ టార్గెట్ చేయొచ్చు. దాన్లోని టూ వే డేటా లింక్ దానికి ఆ అదనపు బలాన్నిచ్చింది. ఇప్పటికే రాయల్ ఎయిర్ఫోర్స్లోని యూరోఫైటర్ టైఫూన్, రాయల్ సౌదీ ఎయిర్ఫోర్స్, లుఫ్త్వాఫీ, స్పానిష్ ఎయిర్ఫోర్స్, ఇటాలియన్ ఎయిర్ఫోర్స్, ఖతార్ ఎయిర్ఫోర్స్, బ్రిటిష్ అండ్ ఇటాలియన్ ఎఫ్ 35 లైట్నింగ్ , దసో రాఫెల్, ఈజిప్షియన్ ఎయిర్ఫోర్స్, స్వీడన్, బ్రెజిల్ ఎయిర్ఫోర్స్లోని జేఏఎస్ 39 గ్రిపెన్లలోకి అది చేరిపోయింది.
స్కాల్ప్.. తక్కువ ఎత్తులో
దీనికే స్టార్మ్ షాడో అని పేరు. బ్రిటన్ ఎయిర్ఫోర్స్ దానికి ఆ పేరు పెట్టుకుంది. ఫ్రెంచ్లో మాత్రం స్కాల్ప్ ఈజీ అని పిలుస్తారు. స్కాల్ప్ఈజీ అంటే సిస్టమ్ డి క్రాయిసరి అటానమీ ఏ లాంగ్ పోర్టీ ఎంప్లోయి జనరల్(జనరల్ పర్పస్ లాంగ్ రేంజ్ క్రూయిజ్ మిసైల్). 560 కిలోమీటర్ల దూరంలోని లక్ష్యాలను ఇది ఛేదిస్తుంది. దీని స్పీడ్ మాక్ 0.8. అంటే దాదాపు సౌండ్ స్పీడ్తో దూసుకెళుతుంది. ఈ మిసైల్ బరువు 1300 కిలోలు ఉంటుంది. ఒక్కసారి ప్రయోగించాక దాంట్లో ఎలాంటి మార్పులూ చేయలేం. టార్గెట్ సమాచారాన్ని మార్చలేం. జీపీఎస్ ఆధారంగా తక్కువ ఎత్తులో ఈ మిసైల్ దూసుకెళుతుంది. టార్గెట్ దగ్గరకు చేరుకోగానే ఒక్కసారిగా పైకి లేచి దాడి చేసేస్తుంది.
