- కరోనా పేషెంట్లతో ఆడుకుంటున్న రాష్ట్ర సర్కార్
- ప్రకటనలకే పరిమితమైన హామీలు
- ఖజానాపై భారం పడొద్దని వెనుకడుగు
- ఆయుష్మాన్ భారత్లో చేర్చకపోవడంతో ఏటా రూ. 200 కోట్ల నష్టం
- ఏపీలో రెండు స్కీంలూ అమలు.. ఫ్రీగా ట్రీట్మెంట్
- మన దగ్గర హాస్పిటల్ ఫీజుల కోసం జనం తిప్పలు
హైదరాబాద్, వెలుగు: కరోనా సోకి జనం అల్లాడిపోతుంటే.. వాళ్లకు ఫ్రీ ట్రీట్మెంట్ అందించాల్సిన రాష్ట్ర సర్కారు తనపై భారం పడకుండా చూసుకుంటోంది. కేంద్ర ప్రభుత్వం నుంచి వచ్చే ప్రయోజనాలు కూడా కరోనా పేషెంట్లకు అందకుండా చేస్తోంది. కార్పొరేట్ హాస్పిటళ్లకు మేలు చేసేలా వ్యవహరిస్తోంది. ఇటు రాష్ట్ర ప్రభుత్వ స్కీం అయిన ‘ఆరోగ్య శ్రీ’లో కరోనా ట్రీట్మెంట్ను చేర్చక.. అటు కేంద్ర ప్రభుత్వ స్కీం అయిన ‘ఆయుష్మాన్ భారత్’ను అమలు చేయక ప్రజల ప్రాణాలతో ఆడుకుంటోందన్న విమర్శలు వస్తున్నాయి. ప్రైవేటు హాస్పిటళ్లు వేసే లక్షల ఫీజులను చెల్లించేందుకు జనం ఆస్తులు అమ్ముకోవాల్సి వస్తోంది. అప్పులు చేయాల్సి వస్తోంది. ప్రస్తుతం రాష్ట్రంలో 21 వేల మంది కార్పొరేట్, ప్రైవేటు హాస్పిటళ్లలో ట్రీట్మెంట్ పొందుతున్నారు. వీరిలో సగటున ప్రతి ఒక్కరూ రోజూ రూ. 50 వేల దాకా ఫీజులు చెల్లించాల్సి వస్తోంది. అంటే రోజూ వంద కోట్ల రూపాయల దాకా ప్రైవేటు హాస్పిటళ్లకు వెళ్తున్నాయి.
ఏడు నెలల కింద సీఎం ఓకే చెప్పినా..?
కరోనా ట్రీట్మెంట్ను ఆరోగ్య శ్రీలో చేర్చాలని, ఆయుష్మాన్ భారత్ స్కీంను అమలు చేయాలన్న డిమాండ్లు గత ఏడాది కరోనా కేసులు మొదలైనప్పటి నుంచి వస్తున్నాయి. ప్రజల నుంచి ఒత్తిడి పెరగడంతో ఆరోగ్యశ్రీలోకి కరోనా ట్రీట్మెంట్ను చేరుస్తామని ఏడు నెలల కింద సీఎం కేసీఆర్ అసెంబ్లీలో ప్రకటించి వదిలేశారు. కానీ, ఇంతవరకూ అమలు చేయట్లేదు. ‘ఆయుష్మాన్ భారత్’లో చేరుతామన్నా అదీ పత్తా లేదు.
కార్పొరేట్ దోపిడీపై ప్రేక్షక పాత్ర
కరోనా సెకండ్ వేవ్ తీవ్రమైనప్పటి నుంచీ కార్పొరేట్, ప్రైవేట్ హాస్పిటళ్లు లక్షల్లో ఫీజులు గుంజుతున్నాయి. పైరవీలు చేసుకుంటే కానీ బెడ్లు దొరకడం లేదు. ఒక వేళ దొరికినా కనీసం లక్ష, రెండు లక్షలు అడ్వాన్ కట్టాల్సిన దుస్థితి నెలకొంది. రోజూ లక్షల్లో బిల్లులు వేస్తున్నారు. గవర్నమెంట్ హాస్పిటళ్లకు పోతే సౌకర్యాలు సరిగ్గా ఉండటం లేదని కార్పొరేట్, ప్రైవేటు హాస్పిటళ్ల వైపే ప్రజలు మొగ్గుచూపుతున్నారు. దీంతో ఆ హాస్పిటళ్లను ఇష్టారీతిగా ఫీజులు వేసి దోచుకుంటున్నాయి. ఇంత ఫీజు చెల్లించలేమని, కొంతైనా తగ్గించాలని కాళ్లావేళ్లా పడినా కనికరం చూపడం లేదు. పేషెంట్ చనిపోయినా చెప్పినంత ఫీజు కట్టాల్సిందేనని, లేకపోతే శవాన్ని ఇవ్వబోమని మొండికేసిన ఘటనలు అనేకం ఉన్నాయి. కార్పొరేట్ హాస్పిటళ్ల దోపిడీపై ప్రభుత్వ టోల్ ఫ్రీ నంబర్లకు దాదాపు 5 వేల ఫిర్యాదులు వచ్చినట్టు్ తెలుస్తోంది. దోపిడీని కట్టడి చేయాల్సిన ప్రభుత్వం ప్రేక్షక పాత్ర పోషిస్తోందన్న ప్రతిపక్షాలు మండిపడుతున్నాయి. ఇంతవరకు ఏ ఒక్క దవాఖానపై చర్యలు తీసుకోలేదు. వేలాది మంది ప్రజలు ఆస్తులను అమ్ముకొని, అప్పులు చేసి ఫీజులు కట్టాల్సి వస్తోంది.
కార్పొరేట్ ఆదాయం తగ్గొద్దు..
ఆరోగ్య శ్రీలో కరోనా ట్రీట్మెంట్ను చేర్చొద్దని చాలా కార్పొరేట్హాస్పిటళ్లు పైరవీలు చేస్తున్నట్లు తెలుస్తోంది. ప్రభుత్వం కూడా ఆరోగ్యశ్రీలో చేరిస్తే ఖజానాపై భారం పడుతుందన్న ఆలోచనతోనే ముందుకు వెళ్లడం లేదని అధికార వర్గాల్లో చర్చ నడుస్తోంది. ‘‘ఇప్పుడు అలా ట్రీట్మెంట్ చేయగానే ఇలా లక్షల్లో ఫీజు వస్తోంది. అదే ఆరోగ్య శ్రీలో చేరిస్తే ప్రభుత్వం ఎప్పుడు ఫీజు రీయింబర్స్మెంట్ చేస్తుందో తెల్వదు. అందుకే ఆరోగ్యశ్రీలో కరోనా ట్రీట్మెంట్ను చేర్చకుండా కార్పొరేట్ వర్గాలు వ్యతిరేకిస్తున్నాయి’’ అని ఓ సీనియర్ ఆఫీసర్ చెప్పారు. ఆరోగ్య శ్రీ కింద ఇతర వ్యాధుల పేషెంట్లకు ట్రీట్మెంట్ చేసిన ఆసుపత్రులకు ఇప్పటికే ప్రభుత్వం సుమారు రూ. 500 కోట్ల బిల్లులు చెల్లించాల్సి ఉంది. ఆ బిల్లులు చెల్లించాలని ఆసుపత్రులు ఒత్తిడి తెస్తున్నాయి. ‘‘ఇలాంటి పరిస్థితుల్లో ఆరోగ్య శ్రీలో కరోనా ట్రీట్మెంట్ను చేరిస్తే ప్రభుత్వంపై మరింత భారం పడుతుంది. దీన్ని భరించే ఆలోచనలో ప్రభుత్వం లేదు’’ అని ఫైనాన్స్ డిపార్ట్ మెంట్ వర్గాలు అంటున్నాయి.
ప్రభుత్వ ఆసుపత్రుల్లో భరోసా ఏది?
ప్రభుత్వంలోని కీలక వ్యక్తులు కరోనా ట్రీట్మెంట్కు ప్రభుత్వ ఆసుపత్రుల్లో చేరట్లేదు.మంత్రులు, ఎమ్మెల్యేలు, ఐఏఎస్, ఐపీఎస్ ఆఫీసర్లు కార్పొరేట్ హాస్పిటళ్లలోనే చేరుతున్నారు. దీంతో సాధారణ ప్రజలు సర్కారు హాస్పిటళ్లలో చేరేందుకు జంకుతున్నారు. మరోవైపు ప్రభుత్వ ఆస్పత్రుల్లో సరైన ట్రీట్మెంట్ అందట్లేదని ఫిర్యాదులు ఉన్నాయి. చాలా ఆసుపత్రుల్లో సీటీ స్కాన్ వంటి మెషీన్లు కూడా లేవు. కొన్ని చోట్ల డాక్టర్ల కొరత ఉంటే, మరికొన్ని చోట్లు పారా మెడికల్ స్టాఫ్ కొరత ఉంది. దీంతో గవర్నమెంట్ హాస్పిటళ్లలో చేరేందుకు జనం భయపడుతున్నారు. అప్పోసప్పో చేసి ప్రైవేటులోనే ట్రీట్మెంట్ కోసం ప్రయత్నిస్తున్నారు.
ప్రకటనలకే పరిమితమైన సీఎం హామీ
గతేడాది కేసులు మొదలైనప్పటి నుంచే కరోనా ట్రీట్మెంట్ను ఆరోగ్య శ్రీలో చేర్చాలని డిమాండ్ వచ్చింది. దీంతో సీఎం కేసీఆర్ 2020 సెప్టెంబర్ 9న అసెంబ్లీలో మాట్లాడుతూ ‘‘ఆరోగ్యశ్రీలో కరోనా ట్రీట్మెంట్ ను చేర్చడాన్ని పరిశీలిస్తాం’’ అని చెప్పారు. ప్రైవేటు ఆసుపత్రుల్లో ట్రీట్మెంట్ చేయించుకుని, ఫీజులు చెల్లిస్తే వాటికి సీఎం రిలీఫ్ ఫండ్ కింద సాయం చేస్తామని హామీ ఇచ్చారు.కానీ సీఎంఆర్ఎఫ్ కోసం అప్లయ్ చేసుకుంటే రిజెక్ట్ చేస్తున్నారని జనం అంటున్నారు.
ఆరోగ్యశ్రీ లో చేర్చాలి
గత నెల 26న కరోనా రావడంతో సూర్యాపేట జనరల్ హాస్పిటల్లో అడ్మిట్ అవుదామని వెళ్తే జాయిన్ చేసుకోలేదు. దీంతో అక్కడే ప్రైవేట్ హాస్పిటల్లో ట్రీట్మెంట్ తీసుకున్న. రూ. 3.28 లక్షలు ఖర్చు అయ్యాయి. మధ్యతరగతి కుటుంబానికి చెందిన మాకు ప్రభుత్వం ఎలాంటి సాయం చేయడంలేదు. కనీసం కరోనా ట్రీట్మెంట్నైనా
ఆరోగ్యశ్రీ పథకంలో చేర్చాలి.
‑ లక్ష్మణ్, సూర్యాపేట
హాస్పిటల్ ఫీజుల కోసం అప్పులు
ఆదిలాబాద్ జిల్లా బుకతపూర్కు చెందిన ప్రఫుల్ తన తల్లి రత్నప్రభకు కరోనా సోకడంతో 10 రోజుల కింద ప్రైవేట్ హాస్పిటల్లో జాయిన్ చేశాడు. కిరాణా దుకాణా నడిపితే కానీ ఇల్లు గడవని ఆ కుటుంబం.. ప్రైవేటులో ఫీజుల కోసం లక్షలు ఖర్చు చేయాల్సి వస్తోంది. 5 రెమ్డిసివిర్ ఇంజక్షన్లతో కలిపి ఇప్పటికి రూ. 4 లక్షలు ఖర్చయ్యాయి. అప్పులు చేయాల్సి వచ్చిందని, అదే ఆరోగ్యశ్రీ, ఆయుష్మాన్ భారత్ కింద ట్రీట్మెంట్ఉంటే ఫ్రీగా ట్రీట్మెంట్ అందేదని, తాను అప్పులు చేయాల్సి పరిస్థితి వచ్చేది కాదని ప్రపుల్ అన్నాడు. ఇంకా ఎంత ఖర్చు అవుతుందో తెలియడం లేదని ఆవేదన వ్యక్తం చేశాడు.
‘ఆయుష్మాన్’లో చేరితే 30 లక్షల మందికి మేలు
కేంద్ర ప్రభుత్వ పథకమైన ‘ఆయుష్మాన్ భారత్’లో రాష్ట్రం చేరితే.. ఎందరికో ప్రయోజనం చేకూరనుంది. కానీ, ఆ పథకాన్ని కూడా రాష్ట్ర ప్రభుత్వం అమలు చేయడం లేదు. అందులో చేరడం లేదు. పక్క రాష్ట్రమైన ఆంధ్రప్రదేశ్లో ఆరోగ్యశ్రీతోపాటు ఆయుష్మాన్ భారత్ కింద కరోనా పేషెంట్లకు ఫ్రీగా ట్రీట్మెంట్ అందిస్తున్నారు. ప్రజల నుంచి వచ్చిన ఒత్తిడితో ఆయుష్మాన్ భారత్లో చేరుతామని రాష్ట్ర ప్రభుత్వం ప్రకటించినా ఇంతవరకు చర్యలు తీసుకోలేదు. గత ఏడాది డిసెంబర్ 30న ప్రధాని మోడీ నిర్వహించిన వీడియో కాన్పరెన్స్ లో సీఎస్ సోమేశ్ కుమార్.. రాష్ట్రంలో ఆయుష్మాన్ భారత్ను అమలు చేస్తామని చెప్పారు. దీనికి సంబంధించి ఓ కమిటీని మాత్రమే ఏర్పాటు చేసి చేతులు దులుపుకున్నారు. ఇంతవరకు ఆయుష్మాన్ భారత్లో రాష్ట్ర ప్రభుత్వం చేరలేదు. ఈ స్కీంలో చేరితే ఏటా కేంద్రం నుంచి సుమారు రూ. 200 కోట్ల నిధులు రావడంతో పాటు దాదాపు 30 లక్షల మందికి ప్రయోజనం చేకూరుతుంది.