విదేశాల్లోని లక్ష మంది ఓటర్లలో 25 వేల మందే వచ్చి ఓటేశారు
న్యూఢిల్లీ: విదేశాల్లోని మనోళ్లలో కేవలం కొంతమంది మాత్రమే ఇక్కడికొచ్చి ఓటు హక్కు వినియోగించుకుంటున్నారని ఎన్నికల కమిషన్ పేర్కొంది. ఉద్యోగమో, వ్యాపారమో చేస్తూ విదేశాల్లో ఉంటున్న ఇండియన్ల సంఖ్య(పౌరసత్వం వదులుకోనివారు) 99,807.. ఇందులో 91,850 మంది పురుషులు కాగా, 7,943 మంది మహిళలు, మిగతా 14 మంది ట్రాన్స్జెండర్లు.. వీరికి భారత పౌరసత్వంతో పాటు ఓటుహక్కు కూడా ఉంది. మొన్న దేశవ్యాప్తంగా జరిగిన లోక్ సభ ఎన్నికల్లో కేవలం 25 వేల మంది మాత్రమే వచ్చి ఓటేసి వెళ్లారు. మిగతా వారు ఓటుహక్కు ఉన్నా వినియోగించుకోలేదు. విదేశాల్లో ఉంటున్న కేరళ ఓటర్ల సంఖ్య ఎక్కువే.. పోలింగ్ టైంలో ఇండియాకు వచ్చి ఓటేసే వారి సంఖ్య కూడా దానికి అనుగుణంగానే ఉంటుందని ఈసీ వెల్లడించింది.
కేరళ ఓటర్ లిస్టులో 85,161 మంది విదేశాల్లో ఉంటున్నారు.. వారిలో 25,091 మంది మొన్నటి లోక్సభ ఎన్నికలపుడు వచ్చి ఓటేసివెళ్లారని తెలిపింది. దేశంలో ఓటుహక్కు ఉన్నా వినియోగించుకోకపోవడానికి ప్రధాన కారణం వచ్చి వెళ్లడానికి అయ్యే ప్రయాణ ఖర్చులేనని ఈసీ అధికారులు భావిస్తున్నారు. ఈ నేపథ్యంలో ప్రాక్సీ ఓటింగ్ సదుపాయం కల్పిస్తే విదేశాల్లో ఉంటున్న ఇండియన్లు అందరూ ఓటేయొచ్చని చెబుతున్నారు. దీనికోసం ప్రవేశపెట్టిన బిల్లు 16వ లోక్సభ తో పాటే రద్దయింది. తాజాగా ఈ బిల్లును మరోసారి సభలో ప్రవేశపెట్టాలని న్యాయ మంత్రిత్వ శాఖ భావిస్తోంది.
