సమస్య ఎదురైనప్పుడు..అప్పటికి సొల్యూషన్ వెతుక్కుని రిలాక్స్ అయ్యేవాళ్లు కొందరైతే.. ఆ సమస్యకి పర్మినెంట్ సొల్యూషన్ వెతికేవాళ్లు ఇంకొందరు. ఈ రెండో కోవకే చెందుతాడు సిద్ధాంత్ తవరవాలా. తనలా మరెవరూ ఇబ్బంది పడొద్దన్న ఆలోచనతో ఎకో– ఫ్రెండ్లీ డిస్పోజబుల్ యూరిన్ బ్యాగ్స్ తయారుచేశాడు. పీస్చ్యూట్ అనే బ్రాండ్ని మార్కెట్లోకి తీసుకొచ్చాడు.
పబ్లిక్ టాయిలెట్స్ సరిపడా లేక, అవేర్నెస్ లేకపోవడం, జనాలు చూసీచూడనట్టు వదిలేయడం.. ఇలా కారణం ఏదైతేనేం చాలామంది ఫుట్ పాత్లపై, ఖాళీ స్థలాల్లో యూరిన్ చేస్తుంటారు. అన్నింటికీ మించి టాయిలెట్స్ శుభ్రంగా లేక యూరిన్ని బలవంతంగా ఆపుకుంటారు కొందరు. దీనివల్ల యూరినరీ ట్రాక్ ఇన్ఫెక్షన్లతో పాటు ఇంకా రకరకాల సమస్యలొస్తాయి. అలాగని శుభ్రంగా లేని టాయిలెట్స్ ఉపయోగించినా ఇబ్బందే. అందుకే వీటన్నింటికీ సొల్యూషన్గా డిస్పోజబుల్ పీ(యూరిన్) బ్యాగ్స్ తయారుచేశాడు సిద్ధాంత్. ఈ ఆలోచన ఎలా వచ్చిందని అడిగితే... తనకొచ్చిన సమస్య నుంచే అని చెప్పాడు.
అప్పుడొచ్చింది ఈ ఆలోచన..
మహారాష్ట్రలోని జల్నాలో పుట్టి, పెరిగాడు 38 ఏండ్ల సిద్ధాంత్. చిన్నప్పట్నించీ ట్రావెలింగ్ అంటే ఇష్టం. కాలేజీ రోజుల్లో నెలకో ట్రిప్ వేస్తుండేవాడు. అయితే ఎక్కడికెళ్లినా వాష్రూమ్స్ శుభ్రంగా ఉండేవి కాదు. దాంతో ఈ సమస్యకి ఏదైనా సొల్యూషన్ వెతకాలనుకున్నాడు. సరిగ్గా అప్పుడే తను చదువుకుంటున్న ఇంజినీరింగ్ కాలేజీలో ఎంట్రప్రెనూర్ వర్క్షాప్ పెట్టారు. అందులో పాల్గొన్నాక డిస్పోజబుల్ యూరిన్ బ్యాగ్స్ తయారుచేయాలన్న ఆలోచన వచ్చింది. ఆ వెంటనే గ్రౌండ్వర్క్ మొదలుపెట్టాడు. లిక్విడ్ని నిల్వ చేసే చాలా రకాల మెటీరియల్స్ని టెస్ట్ చేశాడు. వాటర్ బాటిల్స్, పేపర్ బ్యాగులు, బెలూన్స్.. ఇలా అన్నింటితో ప్రయోగాలు చేశాడు. కేంద్ర ప్రభుత్వ పథకం ‘నిధి ప్రయాస్’కి తన ఆలోచన పంపాడు.. ప్రొడక్ట్ ప్రోటో టైప్ని డెవలప్ చేయడానికి పది లక్షలు ఫండ్స్ ఆ స్కీమ్ కింద తీసుకున్నాడు. ఆ ప్రాజెక్ట్ మీద దాదాపు పద్నాలుగు నెలలు పనిచేసి డిస్పోజబుల్ యూరిన్ బ్యాగ్స్ని 2020లో ‘ పీస్చ్యూట్’ పేరుతో మార్కెట్లోకి తీసుకొచ్చాడు. అమెజాన్, ఫ్లిప్కార్ట్ లాంటి ఈ కామర్స్ సైట్స్లో రూ. 15 కి ఒక్కో బ్యాగుని అమ్ముతున్నాడు .
కాస్త చోటుంటే చాలు
ఈ డిస్పోజబుల్ యూరిన్ బ్యాగ్స్ని పేపర్తో తయారుచేశాడు సిద్ధాంత్. పాకెట్ సైజ్ ఉండే ఈ బ్యాగ్స్లో స్పెషల్ జెల్ ఉంటుంది. అది యూరిన్ని సాలిడ్గా మార్చేస్తుంది. వాసన కూడా రాదు. లీకేజ్ సమస్య ఉండదు. వాడిన తర్వాత తేలిగ్గా సీల్ చేసి పడేయొచ్చు. బయట పడేయడం ఇష్టం లేదనుకుంటే ఇంటికి తీసుకెళ్లి డిస్పోజ్ చేయొచ్చు. అయితే ఇక్కడ వచ్చిన సమస్యల్లా పబ్లిక్ ప్లేస్ల్లో ఈ బ్యాగ్స్ ఎలా వాడాలన్నదే. దాంతో మళ్లీ నాలుగు నెలలు వర్క్ చేసి ప్లగ్ అండ్ ప్లే యూరినల్ సొల్యూషన్స్ని తీసుకొచ్చాడు. రీసైక్లింగ్ ప్లాస్టిక్ ప్యానెల్స్తో ‘ పీస్చ్యూట్ బక్సా’ పేరుతో ఫోల్డబుల్ వాష్రూమ్ని తయారుచేశాడు. దీని లోపలికి వెళ్తే సెన్సర్ ద్వారా లైట్స్ వెలుగుతాయి. యూరిన్ బ్యాగ్స్ ఉంటాయి. ఆటోమెటిక్ ఫ్లష్ సిస్టమ్ కూడా ఉంటుంది. అలాగే యూరిన్ బ్యాగ్ ఎనభై శాతం నిండగానే.. బ్యాగ్ మార్చుకోమని అలారం కూడా మోగుతుంది. ప్రస్తుతం వీటిని మహారాష్ట్రలోని కొన్ని మార్కెట్లు, స్కూల్స్, కాలేజీల్లో ఏర్పాటు చేశాడు సిద్ధాంత్. త్వరలో 15, 000 రూపాయలకి ఈ టాయిలెట్స్ని మార్కెట్లోకి తీసుకురానున్నాడు. ‘‘డ్రైనేజీ, ప్లంబింగ్, సిమెంట్, స్టీల్.. ఇవేం అవసరం లేకుండా తక్కువ ఖర్చుతో ఈ టాయిలెట్ని 10 స్క్వేర్ ఫీట్ల స్థలంలో ఇన్స్టాల్ చేసుకోవచ్చు’’ అంటున్నాడు సిద్ధాంత్.