న్యూఢిల్లీ: కొంచెం కష్టపడితే ఇబ్బంది లేకుండా బతకొచ్చు. బాగా కష్టపడితే లక్షలు సంపాదించొచ్చు. కానీ టైమ్కి ట్యాక్స్లు కట్టే సాధారణ పౌరులు.. మన ఎంపీలంత శ్రీమంతులు కావాలంటే మాత్రం 346 ఏండ్లు టైమ్ పడుతుంది. ఇండియన్ పార్లమెంట్లో సంపన్నుల సంఖ్య ఆ రేంజ్లో పెరిగిపోయింది మరి! తలసరి జాతీయ ఆదాయం రూ.1,25,397గా ఉన్నట్లు 2019 జనవరిలో ప్రభుత్వం ప్రకటించింది. ఆ లెక్కన సంపద విషయంలో సాధారణ ట్యాక్స్ పేయర్కి, ఎంపీలకు మధ్య తేడా 2014లో 299 రెట్లుగా ఉంటే 2019నాటికి అది 345 రెట్లకు పెరిగింది. ఎన్నికల నిఘా సంస్థ అసోసియేషన్ ఫర్ డెమోక్రటిక్ రిఫామ్స్(ఏడీఆర్) రిపోర్టు ఆధారంగా, తాజా ఎన్నికల్లో ఎంపీ అభ్యర్థులు సమర్పించిన అఫిడవిట్లలోని వివరాల్ని, 2016–17 లో సాధారణ పౌరులు చెల్లించిన ట్యాక్స్ లెక్కల్ని పోల్చితే సంపదలో ఇద్దరి మధ్య ఎంత గ్యాపుందో తెల్సిపోతుంది. 2014తో పోల్చుకుంటే 2019 నాటికి ఎంపీల ఆస్తులు 7.3 శాతం వార్షిక రేటుతో పెరిగాయి. యావరేజ్ గ్రాస్ ఇన్కమ్ రూ.4.9 లక్షల నుంచి రూ.6లక్షలకు పెరిగింది. 2014లో ఎంపీల యావరేజ్ ఆస్తి రూ.14.7 కోట్లుకాగా, 2019 నాటికి రూ.20.9కోట్లకు పెరిగింది. తిరిగి లోక్సభకు ఎన్నికైన 225 సిట్టింగ్ ఎంపీలతో పోల్చుకుంటే, కొత్తగా ఎన్నికైన ఎంపీల్లోనే శ్రీమంతులు ఎక్కువగా ఉన్నారు. 2009లో కోటి రూపాయలు, అంతకంటే ఎక్కువ ఆస్తి ఉన్నట్లు ప్రకటించిన ఎంపీల సంఖ్య 58కాగా, 2014 నాటికి 82, 2019లో 88కి పెరిగింది
