ఎల్బీ నగర్, వెలుగు: హైదరాబాద్లో చైన్ స్నాచర్లు రెచ్చిపోతున్నారు. ఇప్పటివరకు మహిళల మెడలోంచి చైన్లు కొట్టేస్తున్న స్నాచర్లు.. మగవాళ్ల మెడలోని చైన్లను కూడా వదలట్లేదు. పాలు తీసుకుని వస్తున్న ఓ కిరాణా దుకాణం యజమాని కంట్లో కారం కొట్టి అతడి మెడలోని బంగారు గొలుసును లాక్కెళ్లారు. బుధవారం వనస్థలిపురం సాహెబ్నగర్లో ఈ ఘటన జరిగింది. పద్మావతి కాలనీకి చెందిన బండారి గోవర్ధన్(30) స్థానికంగా శ్రీ మహాలక్ష్మి కిరాణా షాప్ నిర్వహిస్తున్నాడు. ఉదయం 6 గంటలకు పాలు తీసుకొని వీరాంజనేయ కాలనీ నుంచి దుకాణానికి తిరిగివస్తున్నాడు. బైక్ మీద ఫాలో అవుతూ వచ్చిన ఇద్దరు.. గోవర్ధన్ కండ్లలో కారం చల్లి అతడి మెడలోని 2 తులాల బంగారు గొలుసును లాక్కొని పరా రయ్యారు.
గోవర్ధన్ వాళ్లను వెంబడించేందుకు ప్రయత్నించినా ఫలితం లేకుండా పోయింది. ఒకరు బైక్మీద సామనగర్ వైపు, మరొకరు వీరాంజనేయ కాలనీ వైపు పరిగెత్తారని బాధితుడు వెల్లడించాడు. వనస్థలిపురం పోలీసులు స్పాట్కు వచ్చి వివరాలు సేకరించారు. సీసీ కెమెరాల ఆధారంగా నిందితుల కోసం గాలిస్తున్నామని తెలిపారు. ఈ ఘటనపై స్థానికులు ఆశ్చర్యం వ్యక్తం చేస్తున్నారు. మగవాళ్ల నుంచి కూడా చైన్లు కొట్టేసే స్థాయికి కేటుగాళ్లు తెగించారని ఆందోళన వ్యక్తం చేస్తున్నారు. పోలీసులు తగిన చర్యలు తీసుకోవాలని కోరుతున్నారు.
