ముషీరాబాద్,వెలుగు: ఎల్ఐసీ నిధులను స్టాక్ మార్కెట్ లో పెట్టొద్దని ఆల్ ఇండియా ఇన్సూరెన్స్ ఎంప్లాయీస్ అసోసియేషన్ జాతీయ అధ్యక్షుడు వి. రమేశ్ డిమాండ్ చేశారు. ఐపీఓ ద్వారా ఎల్ఐసీ వాటాల ఉపసంహరణ జీవితబీమా సంస్థకు మంచిది కాదని, కేవలం కేంద్రానికి నిధులు సమకూరుతాయే తప్ప పాలసీదారులకు ఏ రకమైన ప్రయోజనం ఉండదని పేర్కొన్నారు. ఎల్ఐసీలో వాటాలు ఉపసంహరించాలన్న కేంద్ర ప్రభుత్వ నిర్ణయాన్ని వ్యతిరేకిస్తూ ఇన్సూరెన్స్ కార్పొరేషన్ ఎంప్లాయీస్ యూనియన్ హైదరాబాద్, సికింద్రాబాద్ డివిజన్ల 20వ మహాసభ ఇందిరాపార్క్ ఎల్ఐసీ బిల్డింగ్ లో ఆదివారం జరిగింది. ఈ సందర్భంగా ఆయన మాట్లాడుతూ 65 ఏండ్లుగా ఎల్ఐసీ పాలసీదారుల సేవలో ఉంటూ దేశానికి కావాల్సిన నిధులు సమకూరుస్తోందన్నారు. కేంద్ర ప్రభుత్వ ప్రతిపాదనను వ్యతిరేకిస్తూ దేశవ్యాప్తంగా ఎంపీలను కలిసి మెమోరాండం ఇస్తామని తెలిపారు.
సమావేశంలో కార్యదర్శి రమేశ్, శ్రీకాంత్, ట్రెజరర్ రవి, సికింద్రాబాద్, హైదరాబాద్ డివిజన్ అధ్యక్ష కార్యదర్శులు రఘు, అభిశ్ రెడ్డి, తిరుపతయ్య, శ్రీనివాస్, సుజాత, ఉద్యోగులు అసోసియేషన్ ప్రతినిధులు పాల్గొన్నారు. -ఆల్ ఇండియా ఇన్సూరెన్స్ ఎంప్లాయీస్ అసోసియేషన్ , జాతీయ అధ్యక్షుడు రమేశ్
