హైదరాబాద్, వెలుగు: రాష్ట్రంలో ధరణి పేరిట స్కామ్లకు పాల్పడుతున్నారని కిసాన్ కాంగ్రెస్ జాతీయ ఉపాధ్యక్షుడు కోదండ రెడ్డి అన్నారు. అవినీతి ఆరోపణలు ఎదుర్కొంటున్న మాజీ సీఎస్ను పక్కన పెట్టుకుని సీఎం కేసీఆర్ వేల కోట్ల రూపాయలు కాజేశారని ఆరోపించారు. కాంగ్రెస్హయాంలో ఇచ్చిన భూములను పేద ల నుంచి గుంజుకుంటున్నారని ఆయన మండిపడ్డారు. శనివారం గాంధీభవన్లో మీడియాతో కోదండరెడ్డి మాట్లాడారు. ఇప్పటి దాకా 75 లక్షల మంది రైతులకు మాత్రమే పట్టాలు ఇచ్చారని, ఆ పట్టాలు కూడా ఏ రాత్రైనా మాయమైపోవచ్చని అన్నారు.
కాంగ్రెస్ పార్టీ ఏ సంస్కరణలను తీసుకొచ్చినా చట్టపరంగా భద్రత కల్పించేలాగానే ఉండేదన్నారు. ధరణి రికార్డుల ప్రక్షాళన కోసం ప్రతి గ్రామానికి తిరిగి హక్కుదారుల నుంచి చాలా విషయాలను సేకరించామని చెప్పారు. లోతుగా విశ్లేషించిన తర్వాతే ధరణి వెనుక పెద్ద మాఫియా ఉందని రేవంత్ రెడ్డి అన్నారని ఆయన పేర్కొన్నారు. ధరణి పోర్టల్లోని తప్పులతో రైతులు ఆత్మహత్యలు చేసుకుంటున్నారని ఆవేదన వ్యక్తం చేశారు.
