నేచురల్ స్టార్ నాని కొత్త సినిమా పైరసీకి గురైంది. మెగాస్టార్ మూవీ టైటిల్ ‘గ్యాంగ్ లీడర్’ తో గత నెల సెప్టెంబర్ 13న విడుదలైన ఈ సినిమా ‘ఆ లీడర్’ అంతా హిట్టు కొట్టలేకపోయింది. జస్ట్ యావరేజ్ టాక్ తో సరిపెట్టుకుంది. అయితే ఈ సినిమా విడుదలై నెల రోజులు కూడా కాకముందే ‘అమెజాన్ ప్రైమ్’ లోకి వచ్చేసింది. నిబంధనల ప్రకారమైతే ఏ సినిమా అయినా సరే.. హిట్టు, ఫట్టు తో సంబంధం లేకుండా కనీసం రెండు నెలలు గడిచిన తర్వాతనే డిజిటల్ ఫ్లాట్ ఫాం లోకి వెళ్లాలి. మరీ ఆ చిత్ర నిర్మాణ సంస్థ మైత్రీ మూవీ మేకర్స్, అమెజాన్ మధ్య ఏం అగ్రిమెంట్ జరిగిందో కానీ గురువారం ఈ సినిమా అమెజాన్ ప్రైమ్ లో దర్శనమిచ్చింది.
విడుదలై నెల కూడా గడవకముందే సినిమాను ఆన్ లైన్ లో పెట్టడంతో నాని అభిమానులతోపాటు, సగటు ప్రేక్షకులు కూడా మండిపడ్డారు. సోషల్ మీడియాలో ఆ చిత్ర నిర్మాతల్ని, అమెజాన్ ప్రైమ్ ను తిడుతూ కామెంట్లు పెట్టారు. ఈ వ్యతిరేకత చూసి ప్రైమ్ లో పెట్టిన కొద్ది సేపటికే సినిమాను అందులోంచి తీసేశారు. కానీ ఆ లోపే జరిగాల్సిన నష్టం జరిగిపోయింది. పైరసీ రాయుళ్లు ఏ మాత్రం ఆలస్యం చేయకుండా ఆ ‘గ్యాంగ్ లీడర్’ ను పైరసీ చేసి తమ వెబ్ సైట్ లో పెట్టారు. తమ అభిమాన హీరో సినిమా 4కే రెజోల్యూషన్ తో ఆన్ లైన్ దర్శనమివ్వడంతో ఇందుకు కారణం అమెజాన్ ప్రైమే నని అంటున్నారు.
