హైదరాబాద్ , వెలుగు: కొత్త సెక్రటేరియట్ నిర్మాణాన్ని వచ్చే ఏడాది జూన్ 2 నాటి కల్లా పూర్తి చేయాలని రాష్ట్ర ప్రభుత్వం భావిస్తోంది. శ్రావణ మాసంలో నిర్మాణ పనులు స్టార్ట్ చేసే అవకాశాలు ఉన్నాయి. ఈ నెల 21 నుంచి శ్రావణ మాసం ప్రారంభం కానుంది. సుప్రీంకోర్టు, హైకోర్టు నుంచి అనుకూలంగా తీర్పు రావడంతో శుక్రవారం సాయంత్రం నుంచి సెక్రటేరియట్ కూల్చివేత పనులు వేగంగా సాగుతున్నాయి. 12 ఫ్లోర్ లు ఉన్న జే , ఎల్ బ్లాకులను పెద్ద పెద్ద మెషిన్లతో కూల్చేస్తున్నారు. సోమవారం వరకు కూల్చివేతలు పూర్తయ్యే చాన్స్ కనిపిస్తోంది. శిథిలాల తరలింపు ప్రాసెస్ నేడో రేపో మొదలవుతుందని అధికార వర్గాలు అంటున్నాయి. కూల్చివేత పూర్తయిన తర్వాత లేదా కొత్త సెక్రటేరియట్ నిర్మాణ పనులు స్టార్టయ్యే ముందు సీఎం కేసీఆర్ సెక్రటేరియట్ కు వచ్చే అవకాశాలు ఉన్నాయని ఆ వర్గాలు చెబుతున్నాయి.
సీఎం స్పెషల్ ఫోకస్
సెక్రటేరియట్ నిర్మాణంపై సీఎం కేసీఆర్ స్పెషల్ ఫోకస్ పెట్టారు. నిర్మాణ పనులను శ్రావణ మాసం లో స్టార్ట్ చేసి వచ్చే ఏడాది జూన్ 2 నాటికి అంటే రాష్ట్ర ఆవిర్బావం రోజు కల్లా పూర్తి చేయాలని ఆయన భావిస్తున్నట్లు టీఆర్ఎస్ వర్గాలు అంటున్నాయి. కాళేశ్వరం ప్రాజెక్టు ప్రారంభం నుంచి పూర్తయ్యే దాకా వరుస సమీక్షలు, పర్యటనలు, సీసీ కెమెరాల ద్వారా పనుల పర్యవేక్షణ ఎలా చేశారో సెక్రటేరియట్ నిర్మాణాన్ని కూడా అలాగే సీఎం పర్యవేక్షించనున్నారని టీఆర్ఎస్ వర్గాలు చెబుతున్నాయి. కొత్త సెక్రటేరియట్ నిర్మాణానికి త్వరలో టెండర్లు పిలవాలని అధికారులు ప్లాన్చేస్తున్నారు. శనివారం ఆర్థికశాఖకు కొత్త సెక్రటేరియట్ ప్రతిపాదనలు అందచేసినట్లు సమాచారం.
